«B» korpýsynyń birqatar qyzmetshileri attestatsııadan bosatyldy
ASTANA. QazAqparat - Memlekettik qyzmet isteri jáne sybaılas jemqorlyqqa qarsy kúres agenttigi tóraǵasynyń orynbasary Aıgúl Shaıymovanyń aıtýynsha, «B» korpýsyna kiretin memlekettik qyzmetshilerdiń bıylǵy attestatsııasy kezinde birqatar azamattar biliktilikti tekserýden bosatylyp otyr, dep xabarlaıdy QazAqparat tilshisi.
«Olardyń ishinde bala kútimindegi demalysta júrgen memlekettik qyzmetshiler, aıaǵy aýyr áıelder, úsh jasqa deıingi balasy bar áıelder, 14 jasqa deıingi balany tárbıelep jatqan jalǵyzbasty analar bar. Sol sııaqty jalǵyzbasty ákeler de attestatsııadan bosatylady. Sondaı-aq zeınet jasyna jaqyn azamattar, memlekettik qyzmette alty aıdan az ýaqyt istep jatqandar da attestatsııadan ótpeıdi. Al demalystan shyqqan qyzmetkerler barlyǵymen birge attestatsııaǵa qatysady. Olardyń demalys túri, alǵan sebebi men merzimi eskerilmeıdi», - dedi A.Shaıymova búgingi baspasóz máslıxatynda.
Onyń aıtýynsha, ortalyq memlekettik organdar deńgeıinde - departament dırektorlary men sarapshylar, oblysta - memlekettik jáne atqarýshy organdarynyń mamandary, al aýdandarda aýdan ákimi orynbasaryna deıingi jetekshi mamandar, aýmaqtyq organdardyń jetekshileri men mamandary attestatsııadan ótetin bolady.
Aıta keteıik, birinshi jartyjyldyqta uıymdastyrylatyn attestatsııalaý barysynda «B» korpýsyna kiretin memlekettik qyzmetshiler zańdy bilý deńgeıine arnalǵan testterdi tapsyrmaıdy. Osy joly olardyń kásibı biliktiligine basa nazar aýdarylady . Al shalǵaı jerde jumys isteıtin mamandar attestatsııany beınebaılanys arqyly tapsyra alady .
