«B» korpýsyndaǵy qyzmetshilerdi qaramaǵyndaǵylary da baǵalaıtyn bolady - Á.Baımenov
ASTANA. QazAqparat - «B» korpýsyndaǵy qyzmetshilerdi baǵynyshty qyzmetkerleri de baǵalaıtyn bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Memlekettik qyzmet isteri agenttiginiń basshysy Álıhan Baımenov málim etti.
«Biz baǵalaýdyń jańa júıesin engizý arqyly qarym-qatynas mádenıetine ózgeris engizgimiz keledi. Endigi ýaqytta «B» korpýsyndaǵy qyzmetshilerdi onyń qaramaǵyndaǵylar da, áriptesteri de baǵalaıtyn bolady. 360 gradýs degen tásil bar. Onda basshyǵa qaramaǵyndaǵy qyzmetkerler men áriptesi belgili qabiletterine sıpattama beredi. Ol yntymaqtastyqta jumys jasaýǵa beıim be, quzyretin bile me, ádepti saqtaı ma degen máseleler kóteriledi. Menińshe, bul ásirese basshy men qaramaǵandyǵylardyń arasyndaǵy qarym-qatynastyń mádenı joǵarylaýyna alyp keledi»,- dedi ol. Agenttik basshysynyń sózine qaraǵanda, «A» korpýsynyń laýazym ıeleri de jyl saıyn baǵalanyp, onyń basshylyq, tulǵalyq qasıetine, kelisimsharttaǵy kórsetkishterge jetken, jetpegendigine nazar aýdarylatyn bolady. «Sonymen birge biz «A» korpýsynan bastap oqytý júıesine jańa baǵdarlamalardy ázirledik. Sebebi, orta eseppen «A» korpýsyndaǵy azamattardyń jasy 45-te. Olar oqýlaryn osydan 20 jyldaı buryn bitirgen. Ókinishke oraı, ol kezde bizdiń bilim berý júıemizde basqarý tásilderi, basqarý pánderi, sheshim qabyldaý, strategııalyq josparlaý, jobalardy basqarý pánderi joǵynan edi. Sol sebepten osy baǵytta arnaıy kýrstar ótkizip, álemniń jetekshi sarapshylaryn iske tartýdamyz», - dedi Á.Baımenov.
