«B» korpýsyna irikteýdiń jańa júıesi engiziledi - Májilis
Zań jobasynyń negizgi maqsaty memlekettik qyzmetke kirýge, ony ótkerýge jáne toqtatýǵa baılanysty qoǵamdyq qatynastardy retteý bolyp tabylady. Atap aıtqanda, zań jobasymen azamattardy «B» korpýsynyń memlekettik ákimshilik laýazymdaryna irikteýdiń jańa júıesi engiziledi. Memlekettik ákimshilik qyzmetshilerdi rotatsııalaý jáne attestattaý tártibi, memlekettik organdarǵa sheteldik jumyskerlerdi qabyldaý sharttary belgilenedi. Máselen, «B» korpýsynyń memlekettik ákimshilik laýazymdaryna alǵash ret nemese qaıtadan kirip otyrǵan azamattar birqatar irikteý satylarynan ótedi. Sonymen qatar, memlekettik qyzmetke qabyldaý úsh kezeńnen turatyn konkýrstyq irikteý arqyly júzege asatyn bolady. Bul rette birinshi kezekte kandıdattar zańdardy bilý men quzyrettilik boıynsha testileýden ótedi. Ekinshiden, memlekettik qyzmetkerler qundylyǵyn ustaný boıynsha komıssııalyq baǵalaýlar bolady. Úshinshi kezekte memlekettik organ suhbattasý arqyly kandıdattyń kásibı bilimin, biliktiligin aıqyndaıtyn bolady. Al konkýrstan sátti ótkender úshin úshten alty aıǵa deıingi aralyqta synaq merzimi belgilenedi. Synaq nátıjesi qanaǵanattarlyqsyz bolǵanda, oǵan taǵy úsh aı qosylady. Qanaǵattanarlyqsyz nátıje qaıtalanǵan jaǵdaıda synaqtan óte almaǵandar jumystan bosatylady. QR Prezıdentiniń "A" korpýsyndaǵy ákimshilik qyzmettiń kadr rezervin irikteý tártibin bekitý bóligindegi quzyreti naqtylanady. Tutastaı alǵanda, memlekettik qyzmet salasynda ashyq konkýrstyq irikteýdi qamtamasyz etýge, quzyrettilik negizinde maqsattyq, ıaǵnı laýazymdyq joǵarylatýǵa, nátıjege baılanysty eńbekaqyny anyqtaýǵa baǵyttalady. Bul sharalar memlekettik qyzmettegi tamyr-tanystyq pen zańsyz qamqorshylyqqa qarsy qımyldardy qamtıdy ári qoǵamnyń qajettiligine tolyq jaýap beredi. Májilis maquldaǵan zań jobasy Senatqa jiberiledi.
