«B» korpýsy laýazymyna úmitkerler memlekettik tilden test tapsyrady

NUR-SULTAN. QazAqparat – Memlekettik qyzmettiń «B» korpýsynyń laýazymyna ornalasýǵa úmitkerlerge «Qaztest» júıesi boıynsha qazaq tilinen test ótkizý josparlanǵan. Bul jaıynda Májilis depýtattarynyń saýalyna QR Premer-Mınıstriniń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasyndaǵy til týraly» Zańynda (budan ári – Zań) memlekettik tildiń qoǵamdyq qatynastardyń barlyq salalarynda, onyń ishinde memlekettik basqarýda qoldanylýynyń quqyqtyq negizderi bekitilgen. Ony oqyp-úırený men damytý úshin jaǵdaı týǵyzý jónindegi mindetter aıqyndalǵan. Zańnyń 23-babynyń 3-tarmaǵyna sáıkes memlekettik tildi belgili bir kólemde jáne biliktilik talaptaryna sáıkes bilýi qajet kásipterdiń, mamandyqtardyń jáne laýazymdardyń tizbesi Qazaqstan Respýblıkasy zańdarymen belgilenedi»,- dedi Úkimet basshysy.

Onyń atap ótýinshe, memlekettik tildiń keń aýqymdy qoldanysyn qamtamasyz etýge baǵyttalǵan Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy júzege asyrylýda.

«Baǵdarlama aıasynda memlekettik qyzmettiń «B» korpýsynyń laýazymyna ornalasýǵa úmitkerlerge «Qaztest» júıesi boıynsha shekti mán belgileı otyryp, testileýden ótkizýdi engizý josparlanǵan», - dedi Asqar Mamın.