B.Geıts 19-ret «eń dáýletti» adam atandy
ASTANA. 23 qyrkúıek. QazAqparat - Jyl saıynǵy dástúrmen Forbes jýrnaly Amerıkanyń eń dáýletti adamdarynyń tizimin anyqtady.
Ol tizimniń basynda 66 mıllıard dollary bar kásipker Bıll Geıts tur. Bul týraly «Alash aınasy» jazady.
Tengrinews.kz-tiń habarlaýynsha, Bıll Geıts taǵy da Amerıkanyń mıllıarderler tiziminiń kóshin bastap tur. Osymen 19-ret eń aýqatty adamdardyń alǵashqysy bolyp tanylyp otyrǵan Microsoft kompanııasynyń negizin qalaýshylardyń biri B.Geıtstiń baılyǵy byltyrǵy kórsetkishten 7 mlrd. dollarǵa artyp, onyń dáýleti 66 mlrd. AQSh dollary ekeni anyqtalǵan. Amerıkanyń 56 jastaǵy kásipkerinen keıingi oryndarǵa ınvestor Ýorren Baffetts 46 mlrd. dollarmen jáne Oracle-niń negizin qalaýshy Larrı Ellıson 41 mlrd. dollar kórsetkishpen reıtınginiń ekinshi, úshinshi oryndaryna jaıǵasypty. Mamandardyń aıtýynsha, bıyl joly bolmaı, kerisinshe tómengi satylarǵa syrǵanaǵandardyń qatarynda Facebook-tyń negizin salýshy Mark Tsýkerberg bar. Ol byltyr ıemdengen 14-orynnan bıyl 36-ǵa deıin birden quldyraǵan kórinedi. Forbes qyzmetkerleriniń málimdeýinshe, M.Tsýkerbergke bir jyldyń ishinde 8,1 mıllıard dollar shyǵyn kelgen.
