B.Esentaeva: «Qazaq Arýy» baıqaýyna Oral men Petropavl qyzdary qatysýǵa nıet tanyta bermeıdi
ASTANA. QazAqparat - Memlekettik til bilýdi erekshe eskeretin «Qazaq Arýy» baıqaýynyń irikteý týryna Oral men Petropavldyń arýlary kelgen joq. Bul týraly búgin Ortalyq kommýnıkatsııalar qyzmetinde ótken brıfıngte «Qazaq Arýy» baıqaýynyń bas prodıýseri Baıan Esentaeva málim etti.
Sondyqtan atalǵan baıqaýda Soltústik Qazaqstan jáne Batys Qazaqstan oblystarynyń ókilderi bolmaıdy.
«Men Qazaqstannyń soltústik óńirlerinde turatyn bizdiń arýlarymyzdy sál belsendirek bolýǵa shaqyramyn. Jyl saıyn osy másele aldymyzdan shyǵa berdi. Arýlarymyz baıqaýǵa qatysýǵa nıet tanyta bermeıdi. Ásirese Petropavl arýlary. Ókinishke oraı, meniń týǵan qalam Oral da belsendi emes. Sol sebepti osy oblystardyń namysyn qorǵaıtyn eshkim joq. Soltústik pen batysty belsendirek bolýǵa shaqyramyn», - dedi B.Esentaeva.
Eń belsendi óńirler: Ońtústik Qazaqstan oblysy, Aqmola jáne Qaraǵandy oblystary. Jalpy fınaldyq kezeńge 21 qatysýshy ótip otyr.
«Bizde fınalǵa shyǵatyn qyzdardyń sany shekteýli emes. Mysaly, byltyr 26 qatysýshy ótken edi. Bul bizdiń baıqaýdyń rekordy bolatyn. Arýlardyń kóptigi sonshalyq - olardyń barlyǵyn kórsetkimiz keldi. Bıyl arýlarymyzdyń sany 21», - dep atap ótti prodıýser.
Aıta keteıik, baıqaýdyń aqtyq syny erteń, 16 naýryzda, Astanadaǵy Kongress holl saraıynda ótedi. Arýlar ajarymen ǵana emes, sonymen qatar qazaq tili bilimi de synalatyn bolady. Sondaı-aq olardyń árqaısysy qazaq dástúrin, tarıhyn, ádebıetin jáne qazaq halqynyń ádet-ǵuryptaryn bilýi tıis.
Eske sala ketsek, «Qazaq Arýy» baıqaýy bıyl altynshy ret ótkizilýde.
