B. Ertaev: Qazaqstan Respýblıkasynyń Qarýly Kúshterinde qyzmet atqarý - ár azamattyń mindeti

Dóńgelek ústel jumysyna Qazaqstan Respýblıkasy Parlamenti Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi, Halyq qaharmany, general-leıtenant Baqytjan Ertaıuly Ertaev jáne Qazaqstan Respýblıkasy Parlamenti Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi, general-leıtenant, tarıh ǵylymdarynyń doktory, professor Abaı Bólekbaıuly Tasbolatov jáne Memleket tarıhy ınstıtýtynyń ǵalymdary, L.N. Gýmılev atyndaǵy Eýrazııa ulttyq ýnıversıtetiniń muǵalimderi qatysty.

General-leıtenant B.E. Ertaev óz sózinde atap kórsetkendeı 1992 jyldyń 7 mamyrynda Elbasynyń Jarlyǵymen Qazaqstan Respýblıkasynyń Qarýly Kúshteri quryldy. «Biz bárin «aq paraqtan» bastaýǵa týra keldi. Qolymyzda tozǵan tehnıkaǵa toly qoımalar, tájirıbeli ushqyshtar men janar-jaǵarmaıdyń joqtyǵynan ushpaıtyn ushaqtar, basqarýsyz áýe qorǵanys júıesi qaldy. 1992-1998 jyldar aralyǵynda Qarýly Kúshterimizdi qaıta quryp, 1999 jyldan bastap, ony túbegeıli reformalaýǵa kóshtik. Nátıjesinde búgin bizdiń Qarýly Kúshterimiz júrgish tehnıkany, qarý-jaraqty, ıgerý armanǵa aınaldy. Sondaǵy jaýyngerlerdiń turaqty jaýyngerlik daıyndyǵy men biliktiligi Qazaqstan Respýblıkasynyń táýelsizdigin nyǵaıtýǵa qosylǵan naqty úles bolyp tabylady. Mine, sondyqtan da, Qazaqstan Respýblıkasynyń Qarýly Kúshterinde qyzmet atqarý - ár azamattyń mindeti», - dedi B.E. Ertaev.

B.E. Ertaev aıtqandaı, ótken jyldarda bizdiń memleketimiz basty máseleni - qazirgi kezde búkil álem moıyndaǵan táýelsiz, derbes memleket qurý mindetin sheshti. Onyń qaýipsizdiginiń kepili - Qarýly Kúshter bolyp tabylady. Táýelsizdigimizdiń irgesi myqty bolýyna birden-bir sebepker - Qazaqstannyń Qarýly Kúshteriniń myqty bolýy.

Baqytjan Ertaıulynyń oıyn ári qaraı tolyqtyrýmen sózin bastaǵan general-leıtenant Abaı Bólekbaıuly Tasbolatov patrıottyq tárbıe jaıly aıtyp ótti: «Jazylǵan kitaptardy nasıhattaýymyz, úgitteýimiz kerek. Mektepterde Prezıdentimiz jaıly jazylǵan kitaptardy, gazet betterine shyqqan maqalalardy balalarǵa oqyp, túsindirý jumystaryn júrgizý kerek. Bizdiń batyrlarymyz bilektiń kúshimen, naızanyń ushymen emes, aqylmen de, parasattylyqpen de, danalyqpen de jeńgen. Sondyqtan patrıottyq sezimmen qatar parasattylyq qatar júredi.

Bizdiń elimiz - halyqaralyq arenada ózindik orny bar, bedeldi, bederli memleket. Ujymdyq qaýipsizdik kelisimshart uıymy, Shanhaı Yntymaqtastyq Uıymy, BBU jáne Eýrazııalyq Ekonomıkalyq Qaýymdastyq quramynda bolý, osynyń barlyǵy asyra siltep aıtqan emes, bizder men sizder ony kúndelikti kórip, estip júrmiz, ol - bizdiń Elbasymyz arqasy».

Qatysýshylar dóńgelek ústelde Elbasynyń Qazaqstan Respýblıkasy Qarýly Kúshterin kóterý jolynda jasaǵan eńbekteri týraly pikir almasty. Qazaqstan Qarýly Kúshteriniń Joǵarǵy Bas qolbasshysy Nursultan Nazarbaev elimizdiń Qarýly Kúshterin jetik mengergen. Barlyq jıyndardy, ózgeristerdi, aýdarmalardy, tehnıkalardy bes saýsaǵyndaı kórip, qadaǵalap otyrady. Sonaý yqylym zamannan beri-aq ata-babalarymyz qasıetti jerimizdi kıe tutyp, darhan dalaǵa dushpan tabanyn darytpaı, qorǵap keldi. Osy darhan dalamyzdy qorǵaý tek Elbasynyń, Qarýly Kúshterdiń ǵana emes, barlyǵymyzdyń mindetimiz ekendigi aıtylyp ótti.

Dóńgelek ústel jumysyna qatysyp otyrǵan Instıtýt qyzmetkerleri, L.N. Gýmılev atyndaǵy EUÝ oqytýshylary, mektep muǵalimderi asa qyzyǵýshylyqpen tyńdap, Qazaqstan Qarýly Kúshterine baılanysty aýqymdy suraqtar qoıyp, túıindi jaýaptar aldy.

«Memleketke qatysty máseleler zerttelip jazylyp jatyr, sonyń ishinde patrıottyq tárbıege kóbirek mán berýimiz qajet. Áskerı taqyrypta jazylatyn tustaryn keńeıtsek. Osyndaı máselelerdi talqylap, saralaý úshin sizderdi bizben birigip jumys jasaýǵa shaqyramyz», - dep dóńgelek ústel jumysynyń moderatory, tarıh ǵylymdarynyń doktory, professor Búrkitbaı Aıaǵan qorytyndylady.