B.Baıbek: McDonald's qurylysy Almatynyń tarıxı kelbetine nuqsan keltirmeıdi
ASTANA. QazAqparat - McDonald's qurylysy Almatynyń tarıxı kelbetine nuqsan keltirmeıdi. Bul týraly búgin Astanada Ortalyq kommýnıkatsııalar qyzmetinde ótken baspasóz máslıxatynda Almaty ákimi Baýyrjan Baıbek málim etti.
"McDonald's - álem moıyndaǵan xalyqaralyq brend. Kóptegen shetel týrısteri qalaǵa kelgen kezde: "Qalada McDonald's bar ma?" dep surap jatady. Olar McDonald's teginnen tegin qalany tańdamaıtyndyǵyn biledi", - deıdi ákim.
Aıta keteıik, bunyń aldynda xabarlanǵanyndaı, McDonald's ǵımaraty Almatyda "Alataý" kınoteatrynyń ornyna salynady dep josparlanýda. Kóptegen jergilikti turǵyndar bul sheshimge qarsylyq bildirgen.
"Almaty seısmıkalyq aýmaqta ornalasqan. Sondyqtan adam ómirine qaýip tóndiretin ǵımarattardy jańasyna aýystyrýdy baqylap otyrýymyz qajet. Sheshim qabyldamas buryn biz ózimiz komıssııamen birge sol kınoteatrdy qarap shyqtyq. 20 jyl boıy bos turǵan eken. Ol alıýkobondtan qaptalǵan. Іshine kirseńizder 90 jyldardan beri jóndeý kórmegen, óte usqynsyz ekenin kóresizder. Árıne adamdar burynǵy ýaqyttaryn eske alady. Biraq ǵımarattyń xali mynadaı, onyń ústine kınoteatrdyń ıesi de ınvestordyń keletinine qýanyp otyr", - dep atap ótti B. Baıbek.
Onyń sózine qaraǵanda, kınoteatrdy buzý týraly sheshim arnaıy komıssııada qabyldanǵan.
"Bul sheshimdi arxıtektorlar qabyldady. Komıssııa otyrysy óte uzaq ótti, oǵan tanymal adamdar engen bolatyn. Sondyqtan bul sheshim komıssııalyq deńgeıde sheshildi. Sondyqtan meniń oıymsha, biz jaqsy kóretin Almaty kelbeti qala beredi jáne óziniń erekshelikterine saı arxıtektýralyq kelbeti damı túsedi", - dedi ol.
