B. Baıbek Almaty qalasy ákiminiń jańa orynbasaryn tanystyrdy

ALMATY. QazAqparat - Búgin Almaty qalasynyń ákimi Baýyrjan Baıbek óziniń jańa orynbasary Rýmıl Taýfıkovty ákimdik ujymyna tanystyrdy. Bul týraly búgin Almaty qalasy ákiminiń baspasóz qyzmetinen habarlady.

Rýmıl Taýfıkov buǵan deıin 2009 jyldan beri QR Prezıdenti Protokolynyń bastyǵy qyzmetin atqaryp kelgen bolatyn.

Endi jańa qyzmette áleýmettik baǵdarlamalar, halyqty jumyspen qamtý, tótenshe jaǵdaılardyń aldyn alý, qalanyń azamattyq qorǵanysy, jolaýshy tasymalyn uıymdastyrý, jol qozǵalysy qaýipsizdigin qamtamasyz etý jáne qylmystyń aldyn alý jumystaryna jetekshilik etetin bolady.

Rýmıl Taýfıkuly Taýfıkov 1974 jyly 30 qańtarda Qyrǵyz KSR-niń astanasy Frýnze qalasynda týǵan. Abaı atyndaǵy Almaty memlekettik ýnıversıtetin (1997- 2000 jj.), «Matematıka jáne ınformatıka», «Quqyqtaný» mamandyqtary boıynsha bitirgen. Qazaq, orys jáne aǵylshyn tilderin meńgergen. 2000 jyldan - «Astana qalasynyń kommýnaldyq menshik qory» MKK bas mamany, bólimshesin basqarýshy. 2001 jyldyń mamyrynan - Astana qalasy ákimi apparatynyń uıymdastyrý-baqylaý jáne mamandarmen jumys isteý bóliminiń bas mamany - Protokol bastyǵy. 2001 jyldyń qarashasynan - QR Prezıdenti Protokolynda konsýltant, sektor meńgerýshisi, bas ınspektory. 2006 jyldyń naýryzynan - QR Prezıdenti Protokoly bastyǵynyń orynbasary. 2009 jyldan beri - QR Prezıdenti Protokolynyń bastyǵy. «Qurmet» ordenimen (2010 j.), «Qazaqstan Respýblıkasynyń táýelsizdigine 10 jyl» (2001 j.), «Qazaqstan Konstıtýtsııasyna 10 jyl» (2005 j.), «Astananyń 10 jyldyǵy» (2008 j.) medaldarymen marapattalǵan.