B.Asad: Sırııadaǵy hımııalyq qarý qoryn joıýǵa 1 mlrd. dollar ketedi
ASTANA. 19 qyrkúıek. QazAqparat - Sırııa Prezıdenti Bashar Asad Sırııadaǵy hımııalyq qarý qoryn joıýǵa ýáde berdi, dep habarlady RBK.
Sırııa basshysynyń sózine qaraǵanda, Sırııadaǵy hımııalyq qarý arsenaldaryn tolyǵymen joıý shamamen 1 mlrd. dollardy quraıdy. B. Asadtyń paıymynsha, joıý jumystaryn bir jyldyń ishinde aıaqtaýǵa bolady.
B.Asad Sırııanyń hımııalyq qarýdy «batyly jetken elge berýge» ázir ekendigin atap ótti. Ol resmı Damaskiniń 21 tamyz kúni bolǵan hımııalyq shabýylǵa eshqandaı qatysy joq ekenin taǵy da atap ótti, sonymen qatar, Reseıdiń osy jaǵdaıdy retteýge baılanysty dıplomatııalyq kúsh salýyn joǵary baǵalady.
Sırııa Prezıdenti onyń Úkimeti el aýmaǵynda BUU sarapshylaryn qaıta qabyldaýǵa daıyn ekenin atap ótti. Ol sonymen qatar, sırııalyq taraptan Reseı dıplomattaryna hımııalyq shabýyldarǵa kóterilisshiler kináli degen «dálelder» berilgenin jetkizdi.
Sırııadaǵy soǵys 2011 jyldyń naýryzynan beri jalǵasyp keledi, 100 myńnan asa adam bul qaqtyǵystyń qurbanyna aınaldy. Arab elindegi jaǵdaı tamyz aıynda Damaski mańyndaǵy hımııalyq shabýylda 350 adam qaza bolǵan oqıǵadan keıin ýshyqty.
Osydan keıin halyqaralyq qaýymdastyq Sırııaǵa qarsy áskerı operatsııanyń bastalý múmkindigin qarastyra bastady. Alaıda bul iske sheteldik áskerılerdiń aralasýy kún tártibinen resmı Damaski, sonymen birge RF men AQSh-tyń arasyndaǵy Sırııanyń hımııalyq qarýyn halyqaralyq baqylaýǵa alý týraly kelesiminen keıin alynyp tastaldy.
