Azyq-túliktiń qymbattaýynan jyldyq ınflıatsııa deńgeıiniń artýy baıqaldy – Premer-Mınıstr
«Ekonomıkanyń naqty sektorynyń qarqyndy damýynyń nátıjesinde bıylǵy 4 aıdyń qorytyndysy boıynsha jalpy ishki ónim 4,4% deıin ósti. Buǵan negizinen óńdeýshi ónerkásip salalary oń yqpal etti.
Atap aıtqanda, bylǵary ónimderin óndirý 23% ósti, sýsyndar óndirisi 19%, plastmassa buıymdaryn shyǵarý jáne kıim-keshek óndirisi 14% ósti. Al jıhaz óndirisi 13,5%, mashına jasaý 9,5%, hımııa ónerkásibi 8,5%, farmatsevtıka 6,5% ósimdi kórsetti», - dedi Á. Smaıylov.
Taý-ken ónerkásibinde ósim negizinen tabıǵı gaz, munaı, metall keni jáne kómir óndirisine tıesili. Qyzmet kórsetý sektorynda saýda 9,6%, kólik 8,4%, jáne baılanys 7,1% artty.
«Qurylys salasy jyl basynan beri 9,5% turaqty ósim kórsetip keledi. Qazirdiń ózinde 3,6 mln sharshy metr turǵyn úı paıdalanýǵa berildi. Bıylǵy 4 aıda Aqmola, Almaty, Pavlodar jáne Shyǵys Qazaqstan oblystarynda, Shymkent pen elordada barlyq negizgi kórsetkishter boıynsha ósim tirkeldi. Al qalǵan óńirler jospardaǵy kórsetkishke qol jetkizý úshin jumysty kúsheıtýi qajet», - dedi Premer-Mınıstr.
Mınıstrler kabıneti basshysynyń aıtýynsha, sanktsııalyq shekteýler aıasynda syrtqy keleńsiz áserlerdi azaıtý jáne ulttyq ekonomıkanyń odan ári damýyn qamtamasyz etý jónindegi is-sharalardy jandandyrý qajet.
«Elde jyldyq ınflıatsııa deńgeıiniń artýy baıqalyp otyr. Oǵan negizinen azyq-túlik taýarlary baǵasynyń ósýi áser etýde. Birikken Ulttar Uıymynyń derekteri boıynsha dúnıejúzinde azyq-túlik baǵalary sońǵy 12 aıda 36% qymbattady. Álemde ásirese, qant, et jáne sút ónimderiniń baǵasy ósip barady. Bul óz kezeginde bizdiń naryqqa da tikeleı áser etip otyr.
Qazirgi ýaqytta Úkimet ınflıatsııany tejeý boıynsha tıisti sharalar qabyldaýda. Memlekettik organdar men ákimdikter jumysty tıimdi qamtamasyz etip, bul máseleni erekshe baqylaýda ustaýy kerek», - dedi Úkimet basshysy.
