Azyq-túliktiń qymbattaýy búkil álemde baıqalady – Saýda mınıstri

NUR-SULTAN. QazAqparat – Álem boıynsha azyq-túliktiń qymbattaýy sońǵy 10 jyldyń rekordtyq kórsetkishine jetti. Bul týraly QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Azyq-túlik baǵasynyń ósýi búkil álemde baıqalady. Birikken Ulttar Uıymynyń Azyq-túlik jáne aýyl sharýashylyǵy qurylymynyń derekterine sáıkes, bıylǵy mamyr aıyndaǵy baǵalar ótken jyldyń sáıkes kezeńimen salystyrǵanda 40%-ke ósken. Bul sońǵy 10 jyldyń rekordtyq kórsetkishi bolyp otyr», - dedi Saýda mınıstri búgingi Úkimet otyrysynda.

Onyń aıtýynsha, baǵanyń qymbattaýy kórshiles elderde de baıqalady. Máselen, Reseımen salystyrǵanda Qazaqstanda kóptegen taýarlar boıynsha baǵa ósimi tómen.

«Ókinishke oraı, álemdik naryq bizge de áser etti. Biraq, bizde ishki naryqtaǵy suranys pen usynystyń teńgerimsizdigine ákeletin qosymsha problemalar baıqalady», - deıdi Baqyt Sultanov.

Aıta keteıik, bıylǵy 5 aıdyń qorytyndysy boıynsha áleýmettik mańyzy bar azyq-túlik taýarlarynyń aıtarlyqtaı qymbattaýy Túrkistan oblysynda – 9,4%, Nur-Sultan qalasynda – 8,5% jáne Almaty qalasynda – 6% tirkelgen.

Baǵanyń eń tómen ósimi Batys Qazaqstan oblysynda – 5,7%, Aqmola oblysynda – 5,6% jáne Qaraǵandy oblysynda – 5,2% baıqalady.