Azyq-túliktiń baǵasyn ustaýǵa arnalǵan aqsha depozıtterde jatyr - AShM

ASTANA. QazAqparat - Búginde pııaz, kartop, qyryqqabat, sábiz sııaqty áleýmettik mańyzy bar azyq-túlik ónimderiniń baǵasyn ustaý úshin árbir oblysta turaqtandyrý qory qurylǵan. Oǵan jyl saıyn atalǵan taýarlarlyń bir bóligi satyp alynady da, tapshylyq kezinde arzan baǵamen naryqqa shyǵarylady. Osylaısha, baǵany qymbattatpaýǵa múmkindik bar. Alaıda turaqtandyrý qorlaryna jaýapty azamattar azyq-túlik aqshasyn depozıtterde aınaldyryp júr, dep xabarlaıdy QazAqparat tilshisi.

QR Aýyl sharýashylyǵy vıtse-mınıstri Qaırat Aıtýǵanovtyń aıtýynsha, azyq-túlik naryǵynda spekýlıatıvti áreketter de joq emes. Al ákimdikter kartop pen qyryqqabat baǵasynyń óskenin Ózbekstanǵa tasymaldanatyn ónimniń artýymen túsindirip otyr. «Bizdińshe, ol basty sebep emes. Ákimdikter ótken jyldyń ónimi esebinen turaqtandyrý qorlaryna azyq-túlikti kóptep satyp alǵanda qazirgi jaǵdaı týyndamas edi. Bizdiń zertteýimizge sáıkes, azyq-túlik ónimderi turaqtandyrý qorlaryna tıisti deńgeıde satyp alynbaıdy. Sonyń saldarynan dál sol taýarlardyń baǵasy kóteriledi. Qazirgi kezde turaqtandyrý qorlaryna satyp alynǵan kartoptyń úlesi 16 paıyzdy qurasa, pııaz - 7 paıyz, al qyryqqabat 5-aq paıyzdy qurap otyr», - dedi Aıtýǵanov Úkimetti búgingi otyrysynda.

Vıtse-mınıstrdiń sózine qaraǵanda, búginde turaqtandyrý qorlaryn áleýmettik mańyzy bar azyq-túlikpen toltyrý jaǵynan Qyzylorda (48 paıyz), Jambyl (12 paıyz) men Aqtóbe (10 paıyz) oq boıy ozyq keledi. «Qalǵan oblystarda azyq-túlik ónimderi az kólemde satyp alynǵan. Al áleýmettik-kásipkerlik korporatsııalar bólingen aqshany bank esep-shottary men depozıtterinde ustap keledi. Máselen, Ońtústik Qazaqstan oblysynyń áleýmettik-kásipkerlik korporatsııasy 1,6 mlrd teńge kólemindegi qarajatty depozıtke salyp qoıǵan. Oblystyń turaqtandyrý qoryna satyp alynǵan azyq-túlikti kólemi nebary 1 myń tonnany quraǵan. Osy oraıda aıta ketken jón, jyl basynan beri Ońtústik Qazaqstan oblysynda áleýmettik mańyzy bar taýarlardyń baǵasy eń qymbat kórsetkishke - 8 paıyzǵa ósken», - dep atap kórsetti Aıtýǵanov.

Budan bólek, Batys Qazaqstan oblysynyń turaqtandyrý qory 63 tonnany satyp aldy da, 261 mln teńgeni esep-shot pen depozıtte qaldyrǵan. Atalǵan aımaqta da áleýmettik mańyzy bar taýarlar 7,8 paıyzǵa qymbattady.