Azyq-túlikti áli de kóp ımporttaımyz – Sarapshy

ASTANA. QazAqparat – «Atameken» UKP AÓK jáne tamaq ónerkásibi departamentiniń dırektory Erbol Eseneev azyq-túliktiń qymbattaýyna jol bermeý maqsatynda qandaı sharalar qabyldaý keregin aıtty, dep habarlaıdy QazAqparat tilshisi.

«Elde belgili bir dısbalans bar. Biz áli kúnge deıin kóptegen azyq-túlikti ımporttap otyrmyz. Árıne, ımport bolǵandyqtan, ónim valıýtaǵa satyp alynady, ol dollar baǵamyna tikeleı baılanysty. Máselen, tonnasy 200 myń teńge bolatyn ónimderdi shamamen 5 mlrd dollarǵa eksporttaımyz. Bul rette sheteldik ónimdi tonnasyna 300 myń teńgeden ımporttaımyz. ıAǵnı, ımport almastyrý máselesin sheshý kerek degen suraq týyndaıdy», - dedi Erbol Eseneev Jibek Joly telearnasynyń efırinde.

Onyń aıtýynsha, Qazaqstanǵa artyq ónimder boıynsha óndiristi ulǵaıtý qajet.

«Shyn máninde, óz óndirisimizdi birneshe ese ulǵaıtýǵa jáne artyq azyq-túlik óndirisine shoǵyrlanýǵa barlyq múmkindik bar. Mysaly, alma jemisin alaıyq. Tutynýshy retinde baǵanyń qandaı korrelıatsııasy bolsa da, alma is júzinde birdeı baǵada qalady. 10 jyl buryn almanyń quny 350 teńge bolsa, qazir tutynýshy olardy shamamen 500 teńge satyp alýda. Munyń bári artyq óndiristiń arqasy. ıAǵnı, memleket jaǵdaı jasady. Qazaqstanda sońǵy bes jylda otandyq alma óndirisi 40%-ǵa ósti. Qazir ımportqa táýeldi ónim túrleri – qant, sút ónimderi qymbattap jatyr», - dedi E.Eseneev suhbatynda.