Azyq-túlikten tapshylyq bolmaıdy– Almaty ákiminiń orynbasary
ALMATY. QazAqparat - Almatyda ulttyq valıýtanyń qunsyzdanýyna baılanysty azyq-túlik baǵasynyń óskeni baıqalady. Bul týraly onlaın-brıfıng kezinde qala ákiminiń orynbasary Saparbek Tuıaqbaev aıtty, dep habarlaıdy QazAqparat tilshisi.
Onyń aıtýynsha, ákimdik kún saıyn áleýmettik mańyzy bar azyq túlik baǵasyn baqylap otyr.
«Barlyq bazarlar men dúkender boıynsha táýligine eki ret jedel aqparat alynady. Azyq-túlik baǵasy sál kóterilgen. Onyń sebebi, teńgeniń qunsyzdanýy. Áleýmettik mańyzy joǵary azyq-túlik taýarlaryn qatań baqylaýda ustap otyrmyz. Turaqtandyrý qorynan 5 mlrd teńge bólindi. Osy baǵytta kelisimsharttar jasalatyn bolady. Dúısenbiden bastap iske qosamyz. Bizde ótken aptada 12 myń tonna kóleminde qor bar bolatyn. Ony qazir «Small» men «Magnum» dúkenderi arqyly belsendi satyp jatyrmyz. Atalmysh marketterdegi baǵa áli turaqty», - dedi ol.
Onyń aıtýynsha, qazir qalada baǵany turaqtandyrý úshin iri jetkizýshilermen kelisim júrgizilip jatyr. Kelisimsharttar maýsym aıynyń aıaǵyna deıin belgilenbek.
Sonymen qatar, megapolıste meıramhanalar men dámhanalardyń, sondaı-aq onlaın-dúkenderdiń jumysy kúsheıtilgen. Sonymen qatar qalaǵa azyq-túlik tasymaldaıtyn júk kólikterine «jasyl dáliz» uıymdastyryldy.
«Búginde qalaǵa syrttan keletin nemese syrtqa shyǵatyn azyq-túlik tasymaldaýshy kólikter men logıstıkalyq qyzmet túrlerine «jasyl dáliz» qamtamasyz etildi. Almatyda áleýmettik mańyzdy 19 túrli taýardyń túri bar. Azyq-túlikten tapshylyq bolmaıdy. Olar tıisti kólemde jetkiziledi», – dedi S. Tuıaqbaev.
