Azyq-túlik taýarlarynyń 6 túrine óndiristi ulǵaıtý mindeti qoıyldy
NUR-SULTAN. QazAqparat – 11 azyq-túlik taýary boıynsha qamtamasyz etý 80 paıyz deńgeıinde. Bul týraly QR Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
«Іshki naryqty azyq-túlik taýarlarymen molaıtýǵa qatysty Memleket basshysy 2020 jylǵy 1 qyrkúıektegi Qazaqstan halqyna Joldaýynda barlyq áleýmettik mańyzy bar azyq-túlik taýarlary boıynsha ózin-ózi qamtamasyz etý deńgeıine qol jetkizý mindetin alǵa qoıdy. Іshki naryqty qamtamasyz etý monıtorıngi azyq-túlik taýarlarynyń negizgi 29 túri boıynsha júrgiziledi. Onyń ishinde 12 taýar pozıtsııasy boıynsha ishki naryq 100 paıyzǵa jáne odan da kóp mólsherge qamtamasyz etilgen. 11 azyq-túlik taýary boıynsha qamtamasyz etý 80 paıyz jáne odan astam. Bul halyqaralyq aýyl sharýashylyǵy uıymy – FAO-nyń synyptamasy boıynsha ózin-ózi jetkilikti qamtamasyz etý deńgeıi bolyp sanalady», - dedi mınıstr Úkimet otyrysynda.
Onyń sózine qaraǵanda, azyq-túlik taýarlarynyń 6 túri boıynsha ǵana óndiristi ulǵaıtý jáne ishki naryqty otandyq ónimdermen molyqtyrý sharalaryn iske asyrý qajet. Bular – qus eti, shujyq ónimderi, irimshik pen súzbe, alma, qant jáne balyq.
«Mınıstrlik Іshki naryqty otandyq ónimdermen molaıtý jónindegi 2021 – 2023 jyldarǵa arnalǵan keshendi jospar jobasyn daıyndady. Árbir baǵyt boıynsha ınvestıtsııalyq jobalardyń naqty pýly anyqtaldy», - dedi S. Omarov.
