Azyq-túlik taýarlary baǵasynyń ósimi 7,4 paıyz boldy
ASTANA. 3 qarasha. QazAqparat /Rýslan Ǵabbasov/ -2010 jyldyń qańtar-qazan aılarynda 2009 jyldyń jeltoqsanyna qaraǵanda azyq-túlik taýarlary baǵasynyń ósimi 7,4 paıyz boldy. Bul týraly búgin Astanada QazAqparat tilshilerine Ekonomıkalyq damý jáne saýda mınıstrligi saýda komıtetiniń saýda ınfraqurylymyn damytý basqarmasynyń bastyǵy Danııar Ahmetov aıtty.
Onyń sózine qaraǵanda, azyq-túlik emes taýarlardyń baǵasynyń ındeksi bıylǵy jyly ótken jylǵa qaraǵanda 1,6 esege tómen (4,5 paıyzdy qurady).
«2010 jyldyń qańtar-qazan aılarynda ıaǵnı, 2009 jyldyń jeltoqsanyna qaraǵanda, azyq-túlik taýarlary baǵasynyń ósimi 7,4 paıyzdy qurady, bul kórsetkish ótken jyldyń osy kezeńimen salastyrǵanda 3,1 esege artyq. 6-8 paıyz josparlanǵan ınflıatsııa dálizinde bolý úshin azyq-túlik taýarlary boıynsha ınflıatsııa 9,4 paıyzdan aspaýy tıis»,-dep atap ótti D. Ahmetov.
Óńirler boıynsha 2010 jyldyń qazanynda ıaǵnı, 2009 jyldyń jeltoqsanymen salystyrǵanda azyq-túlik taýarlary boıynsha ınflıatsııanyń ortasha respýblıkalyqtan joǵary deńgeıi Astanada (10,8 paıyz), OQO (8,4 paıyz), Mańǵystaý oblysynda (8,3 paıyz), Qaraǵandy oblysynda (7,9 paıyz) jáne Jambyl oblysynda (7,5 paıyz) qalyptasty»,-dedi ol.
Osy oraıda ol 2010 jyldyń qazanynda 2009 jyldyń jeltoqsanyna qaraǵanda ınflıatsııa 6,2 paıyzdy quraǵanyn, ıaǵnı bul kórsetkish ótken jyldyń osy kezeńine qaraǵanda 1,1 paıyzǵa joǵary ekenin eske salyp ótti.
