Azyq-túlik salasynda Reseı men Belarýs tarapynan dempıng baıqalýda - «Atameken» UKP

ASTANA. QazAqparat - Qazaqstanda azyq-túlik naryǵy tıisti deńgeıde qorǵalmaı jatyr. Bul týraly búgin Májiliste «Ósimdik sharýashylyǵy ónimin óńdeýdiń problemalary týraly» taqyryppen ótken dóńgelek ústelde «Atameken» UKP Agroónerkásiptik keshen jáne tamaq ónerkásibi departamentiniń dırektory Erbol Eseneev málim etti, dep habarlaıdy QazAqparat.

«Bizdiń salada eki myńnan astam kásiporyn jumys istep jatyr. Onyń ishinde tek 700-i orta jáne iri kásiporyndar. Sonymen qatar salada 55 myńnan astam adam eńbek etýde. Barlyq óńdeýshi ónerkásiptiń 18 paıyzǵa jýyǵy tamaq ónerkásibine tıesili. Árıne, osy salanyń áleýeti joǵary. Atap aıtqanda, bizdiń ónimge qytaılyq naryq pen Taıaý Shyǵys elderi aıtarlyqtaı qyzyǵýshylyq tanytýda», - dep toqtaldy Eseneev.

Osy oraıda ol astyqty, maıly daqyldardy qaıta óńdeý baǵytyndaǵy áleýetti tolyqtaı paıdalaný kerektigin atap ótti.

«2013 jyldan bergi málimetterge toqtalatyn bolsaq, osy saladaǵy ınvestıtsııalar eki esege artty, ıaǵnı 62 mlrd. teńgege jetti. Alaıda bizdiń kásiporyndardyń júktemesi tıisti deńgeıde emes. Jalpy, ósimdik sharýashylyǵy ónimin óńdeý kórsetkishi tek 50 paıyzǵa júktelgen. Bul óz kezeginde bıznesti de, Úkimetti de alańdatyp otyr. Osy turǵyda negizgi problema salyq júıesiniń jetildirilmeýinen, sondaı-aq Reseı men Belarýstegi áriptesterimiz tarapynan qatań dempıngtiń oryn alýynan bolyp otyr», - dedi Erbol Eseneev.

Onyń sózine qaraǵanda, ishki naryq tıisti deńgeıde qorǵalmaı jatyr.

«Barlyqtaryńyz tutynýshy bolyp tabylasyzdar, osy oraıda qazaqstandyq naryqta azyq-túlik óniminiń ımporttaýshylary qanshalyqty emin-erkin sezinetindigin baıqap júrsizder. Keıbir memlekettik organdar elge qadaǵalaýsyz tasymaldanyp jatqan ónimge qajetti áreketter jasaı almaýda. Máselen, reseılik «Rospotrebnadzor» qandaı da bir shekteýdi engizý úshin sebepter taýyp jatyr. Sondyqtan bul turǵyda kóptegen máseleler barshylyq», - dep túıindedi sózin «Atameken» UKP ókili.