Azyq-túlik ónimderin sertıfıkattaý salasynda akkredıtteýdiń jańa baǵyty engizildi

ALMATY. QazAqparat - Ulttyq akkredıtteý ortalyǵy akkredıtteýdiń jańa baǵyttaryn engizip otyr. Standarttaý jáne akkredıtteý salasyndaǵy jańashyldyqtar týraly onlaın brıfıng barysynda Almaty Ulttyq akkredıtteý ortalyǵy ókildiginiń basshysy Vıktor Tomasevıch aıtyp berdi, dep habarlaıdy QazAqparat tilshisi.

Búgingi tańda ulttyq akkredıtteý ortalyǵy akkredıtteýdiń jańa shemalaryn engizý úshin agroónerkásiptik keshen, medıtsına jáne menedjment júıesi salasynda jumystar júrgizip jatyr. Bul osy salalarda jyl saıyn kórsetiletin qyzmetterdiń ósýine baılanysy jáne soǵan qaraı sáıkestikke baǵalaý júrgizý qajettiligi týyndaıdy.

«Saýda ortalyqtary men dúkenderdegi sórelerde «Halal» tańbasy bar ónimder óte kóp. Ónimge tańbalaýdy «Halal» sertıfıkattaý jónindegi organdar salady. Keıbir jaǵdaılarda óndirýshilerdiń ózi uqsas belgini qoıady. Qazirgi ýaqytta Qazaqstanda eki ulttyq standart qabyldandy, biraq sertıfıkattaý organdaryn úılestirý úshin zańnamanyń bolmaýyna baılanysty el aýmaǵyndaǵy kez kelgen kásiporyn ózderiniń bilimi men iskerligin negizge ala otyryp, «Halal» standarttary boıynsha jumys isteı alady», dep habarlady Vıktor Tomasevıch.

Sonymen qatar, ol Qazaqstanda «Halaldy» úshinshi taraptyń rastaýynsyz derbes sertıfıkattaýdy júzege asyratyn bes uıym bar ekenin jetkizdi.

«Biz akkredıtteý úshin áleýeti bar zerthanalyq bazaǵa sholý jasadyq. Qazirgi ýaqytta akkredıttelgen sýbektiler tiziliminde 175 zerthana bar, olar Kedendik Odaqtyń (TR KO 021/2011) 021 tehnıkalyq reglamenti jáne tamaq ónimderin sertıfıkattaýdyń 49 organy boıynsha tamaq ónimderine taldaý júrgizedi. Akkredıttelgen zerthanalar arasynda 37 zerthananyń DNQ-ny sáıkestendirý úshin taldaý júrgizý múmkindigi bar», - tolyqtyrdy spıker.

Onyń aıtýysha, oganıkalyq ónim salasy da mańyzdy. Bizdiń elde organıkalyq ónim óndiriledi, biraq ony sertıfıkattaýdy sheteldik organdar júzege asyrady. Qazir Qazaqstanda atalǵan ónimdi baǵalaý júıesi qurylyp jatyr.