Azyq-túlik ónimderin satýdyń jańa júıesi iske qosylady
ASTANA. 16 qańtar. QazAqparat - Taıaý ýaqytta Astana qalasynda azyq-túlik ónimderin satýdyń jańa júıesi jumys isteı bastaıdy. Bul týraly búgin Astana qalasy mańyndaǵy azyq-túlik beldeýin damytý jóninde ótken keńeste «QazAgroMarketıng» AQ Basqarmasynyń tóraıymy Aıgúl Ahmetjanova málim etti.
Elordanyń resmı saıtynyń jazýynsha, búgingi tańda taýar óndirýshiler men naryq arasyn deldaldar baılanystyrady. Al deldaldar ónimdi saýda núktelerine óz baǵasynan 25% qymbatqa ótkizedi, buǵan saýda jelileriniń qosatyn 15%-y taǵy bar. Munyń bári taýardyń básekege qabilettiligine teris áser etedi.
Astananyń azyq-túlik beldeýine negizinen tabıǵı taza ónim shyǵaratyn kásiporyndar kiredi, al tabıǵı tásilmen óndiriletin ónimder tez buzylady. Bul ónimderdi saqtaý óte qıyn, arnaıy qoımalar, muzdatqyshtar bólý qajet. Sondyqtan saýda jelileri men deldaldar bul ónimderdi satyp alýǵa múddeli emes. Al halyq tabıǵı taza ónimdi talap etedi.
Osyǵan baılanysty, «Qazagromarketıng» AQ jańa taýar ótkizý júıesin qurýdy josparlap otyr. Júıe eki bólimnen turady. Birinshisi - ónimdi saýda oryndaryna jetkizý protsesin basqarý. Qazir bizdiń kompanııa barlyq saýda jelilerindegi belgili taýar túrlerine taldaý júrgizip, taýar óndirýshiler men saýda jelilerin bizdiń server arqyly baılanystyrýǵa múmkindik beretin elektrondyq baǵdarlama ázirlep jatyr.
«Ekinshisi - ónimdi saýda jelilerine tikeleı jetkizý. Qazir kompanııa saıt jasap jatyr, ol eki-úsh apta ishinde jumys isteı bastaıdy. Saıtta azyq-túlik taýarlaryn óndiretin barlyq kásiporyndardyń tizimi men ónim túrleri jazylady. Osylaısha, saýda jelilerine ózine qajetti naqty taýar óndirýshini tańdaýǵa múmkindik beriledi. Saıt kún saıyn jańartylyp otyrady. Budan bólek, «Qazagromarketıng» AQ Reseı Federatsııasynyń iri ónerkásip ortalyqtary - Omby, Ekaterınbýrg, Samara, Chelıabi qalalaryna otandyq ónimdi eksporttaý men osy qalalarda ózimizdiń logıstıka ortalyqtarymyzdy salý múmkindikterin qarastyryp jatyr», - dedi Aıgúl Ahmetjanova.
