Azyq-túlik, qurylys materıaldary tıelgen 8 júk kóligi SQO-ǵa jol tartty - Pavlodar
Onyń ekeýi 700 shaqyrymdyq joldy júrip ótip, keshke Petropavl qalasynda bolady. Qalǵan alty júk kóligi «Nur Otan» logotıpimen bir jarym saǵat buryn Omby tas jolymen júrip ketti. Mejeli mekenge jetpes buryn júk kólikteri Reseı Federatsııasynyń shekarasynan ótip, Omby qalasynan shyǵaryp salynady. Tótenshe jaǵdaı oryn alǵan aımaqqa Pavlodar oblystyq máslıhatynyń hatshysy Vladımır Berkovskıı men «Nur Otan» partııasy oblystyq fılıaly tóraǵasynyń birinshi orynbasary Ilıa Terenchenko arnaıy attandy.
«Óńirdegi 30 iri kásiporyn men orta jáne shaǵyn bıznes ókilderi kómek qolyn sozdy. Negizinen, un, makaron ónimderi, kartop, suıyq maı, sondaı-aq turmystyq tehnıka, teledıdar, kir jýǵysh mashına, tósek-oryn jabdyqtary jınaldy. Bári jańa. Aqshalaı kómekti jınaǵan joqpyz. Kómek sharasy aımaq basshysy Bolat Baqaýovtyń jáne aýdandar men qala ákimderiniń qoldaýymen jasaldy», - dedi Ilıa Terenchenko. Vladımır Berkovskıı atap ótkendeı, Ertis óńirinde Qazaqstandaǵy sý tasqyny jaǵdaıy jiti nazarǵa alynǵan. «SQO-daǵy áriptesterimizben únemi baılanystamyz. Pavlodar oblysy mundaı kómek berý sharalaryn burynnan beri júrgizedi. Árıne, jiberilgen zattar zardap shekkenderge úlken kómek bolady. Biz bárimiz qazaqstandyqpyz - bir otbasymyz. Sondyqtan qıyndyq kelgende jumyla atsalysyp kómektesý kerekpiz», - dedi Vladımır Berkovskıı.
