Azyq-túlik korporatsııasynyń jarǵylyq kapıtaly 70 mlrd teńgege ulǵaıady
«800 myń tonna kóleminde astyqty forvardtyq satyp alý úshin Azyq-túlik korporatsııasynyń jarǵylyq kapıtalyn ulǵaıtýǵa respýblıkalyq bıýdjetten 70 mlrd teńge bólý jumysy júrip jatyr. Qarjy ekonomıkalyq negizdeme jáne memlekettik ınvestıtsııalyq usynys ázirlendi. Sondaı-aq qarjylandyrýdyń bul túri Agroónerkásip keshenin damytýdyń tujyrymdamasyna engizildi. Tujyrymdama jobasy Prezıdent Ákimshiligine kelisýge joldandy», - dedi Erbol Qarashókeev.
Mınıstrdiń atap ótýinshe, agroónerkásip kesheninde ónim óndirý kólemin ulǵaıtý úshin 57,6 myń mal basy bar, jyldyq qýaty 373 myń tonna sút óndiretin 65 taýarly sút fermasy qurylady.
Táýligine 1 000 tonna maıly tuqymdardy qaıta óńdeý qýatymen maı ekstraktsııalaý zaýyty jáne kókónis ósirý boıynsha qýattylyǵy 6,4 myń tonna jylyjaı keshenin salynady.
Qus etin óndirý boıynsha 10 joba jáne et qaıta óńdeý boıynsha 8 joba paıdalanýǵa beriledi.
«Turaqtandyrý qorlarynyń júktemesin qamtamasyz etý úshin olardyń jumys prıntsıpi qaıta qaralyp jatyr. Máselen, ákimdikter óńirdiń qajettiligin óńirlik suranys negizinde halyqtyń 3 aılyq qajettiliginiń 50 paıyzyna deıin aıqyndaıdy. Áleýmettik kásipkerlik korporatsııalar aýyl sharýashylyǵy taýaryn óndirýshilerde ónimdi satý bastalǵanǵa deıin kókónisterdi saqtaý shartymen forvardtyq satyp alýdy júzege asyrady», - dedi mınıstr.
