Azyq-túlik korporatsııasy Ońtústik Qazaqstan jáne Qyzylorda oblystaryna belgilengen baǵa boıynsha astyq jetkizetin bolady
ASTANA. Qyrkúıektiń 3-i. QazAqparat - «QazAgro» Ulttyq basqarýshy holdıngi» aktsıonerlik qoǵamy, Ońtústik-Qazaqstan jáne Qyzylorda oblystarynyń ákimdikteri, «Astyq odaǵy», «Astyq óńdeýshiler men naýbaıshylar odaǵy» astyqpen qamtamasyz etý jónindegi memorandýmdarǵa qol qoıdy.
Memorandýmdardyń negizgi maqsaty - 1 surypty bólke nannyń baǵasyn negizsiz kóterýge jol bermeý.
Qujat talaptaryna sáıkes, ákimdikter nan pisiretin kásiporyndardy belgili baǵa boıynsha unmen qamtamasyz etetin astyq óńdeýshi-operatorlardy belgileıdi. Al «QazAgro» holdıngi óziniń enshiles kompanııasy - «Azyq-túlik kelisim shart korporatsııasy» aktsıonerlik kompanııasy arqyly qoldaǵy astyq qorynan operatorlarǵa 26 500 teńge baǵamen astyq jetkizetin bolady.
Azyq-túlik korporatsııasy astyqty jetkizýdi 2010 jyldyń qyrkúıek aıynyń 1-inen bastap 2011 jylǵy qazannyń 1-ine deıingi aralyqta aı saıynǵy qajettiligine sáıkes keste boıynsha júzege asyrady. Azyq-túlik korporatsııasy kestege sáıkes ákimdikterdiń ótinishin qanaǵattandyrmaǵan jaǵdaıda, «Astyq odaǵy» operatordy kórsetilgen baǵa boıynsha astyqpen qamtamasyz etýdi óz mindetine alady. Astyq óńdeý uıymdarynyń astyqty maqsatty paıdalanýdy qamtamasyz etýdi baqylaý jáne nan ónimderine baǵany negizsiz kóterýge jol bermeý ákimdikterdiń mindetine júkteledi.
Buryn aıtylǵandaı, Qazaqstan Respýblıkasy Prezıdenti N.Á. Nazarbaevtyń tapsyrmasyn oryndaý maqsatynda Ekonomıkany jańartý jónindegi memlekettik komıssııanyń ústimizdegi jylǵy 26 tamyzdaǵy otyrysynda «QazAgro» ulttyq basqarýshy holdıngi» AQ 26 500 teńge baǵamen 2 mıllıon tonna astyqty satyp alýy týraly sheshim qabyldandy. Satyp alýdy qarjylandyrýdyń kózi Holdıngke respýblıkalyq bıýdjetten berilgen qarajat, sondaı-aq QazAgronyń menshikti qarajaty bolyp tabylady. Satyp alýdy Azyq-túlik korporatsııasy oblystar arasynda eginniń jalpy túsimine mólsherles bólinetin belgilengen kvota boıynsha júrgizedi.
Atalǵan sharalar aýylsharýashylyq taýaryn óndirýshilerge ózderiniń qajet tabys deńgeıin saqtaýǵa múmkindik beredi, eldiń azyq-túlik qaýipsizdigin qamtamasyz etedi, sondaı-aq sharýalardyń esep aıyrysýy úshin qarajatpen qamtamasyz etý arqyly astyq sharýashylyqtarynyń qarjylyq tólempazdyǵyn jaqsartady.
