Azyq-túlik korporatsııalaryna bıýdjetten 70 mlrd teńge bólinýi múmkin

ASTANA. QazAqparat – Aýyl sharýashylyǵy mınıstri Erbol Qarashókeev Azyq-túlik korporatsııasynyń jarǵylyq kapıtalyna bıýdjetten 70 mlrd teńge bólýdi surady, dep habarlaıdy QazAqparat tilshisi.

«Mańyzdy másele - kóktemgi naýqandy ońtaıly ýaqytta ótkizý. Buǵan memleket qabyldaǵan is-sharalar, onyń ishinde azyq-túlik korporatsııanyń forvardtyq satyp alýy yqpal etedi. 2020 jyly osy maqsatqa bıýdjetten 24,5 mlrd teńge bólindi. Keıingi jyldary baǵdarlamany qarjylandyrý ulǵaıdy. Bul rette Azyq-túlik korporatsııasynyń qarajaty esebinen tolyq júzege asyryldy», - dedi ol búgin Úkimet otyrysynda.

Mınıstrdiń aıtýynsha, korporatsııa qolda bar qarajat esebinen jalpy somasy shamamen 31,5 mlrd teńgege kóktemgi egis jumystaryn júrgizýdi qarjylandyrýdyń 2 tetigin pysyqtaýda.

«Birinshi - óńirlerdiń ótinishterin eskere otyryp, qarajatty paıdalanǵany úshin komıssııany qoldanbaı, 20 mlrd teńge somasynda qaryz qarajaty esebinen kóktemgi-jazǵy qarjylandyrý. Ekinshi - taýarlyq nesıe berý negizinen iri aýyl sharýashylyǵy taýarlaryn óndirýshilerge olardyń astyqty satý jáne keıinnen 11,5 mlrd teńge somasyna kóktemgi egis jumystaryn qarjylandyrý. Kóktemgi naýqandy forvardtyq satyp alý arqyly qarjylandyrý somasyn ulǵaıtý úshin Azyq-túlik korporatsııasynyń jarǵylyq kapıtalyna bıýdjetten 70 mlrd teńge bólý usynylady», - dedi Erbol Qarashókeev.

Onyń atap ótýinshe, ol úshin agroónerkásiptik keshendi damytý tujyrymdamasyna ózgerister engiziledi. Atalǵan tujyrymdamada tıisti is-shara kózdeletin bolady.