«Azyq-túlik kelisimshart korporatsııasy» satyp alynǵan astyqtyń aqshasyn der kezinde tóleýde - korporatsııa ókili
ASTANA. Jeltoqsannyń 25-i. QazAqparat /Marlan Jıembaı/ - «Azyq-túlik kelisimshart korporatsııasy» satyp alynǵan astyqtyń aqshasyn tóleýge qatysty búkil jumystardy ýaqtyly atqaryp otyr.
Bul jaıynda búgin atalǵan korporatsııada ótken selektorlyq keńeste Astyq satyp alý departamenti dırektorynyń orynbasary Oljas Maqatov málim etti.
«Bizge jeke sharýashylyqtardyń, jergilikti jerdegi ákimshilikterdiń kómegi qajet. Sebebi qazir qystyń ýaqyty bolǵandyqtan keıbir jerlerde jol joq, keıbir elevatorǵa jetkizilgen astyqtyń sapasy sáıkes kelmeı jatady. Sonymen qatar sharýashylyqtar ózderiniń tarapynan bizge tólemge qajetti qujattardy ýaqytynda tapsyrmaýda. Osy sebepten bizdiń satyp alǵymyz kelip otyrǵan astyq mólsheri óz mejesine jetken joq», dedi ol óz sózinde.
O.Maqatovtyń aıtýynsha, korporatsııa jergilikti atqarýshy organdardyń, oblystyq aýyl sharýashylyǵy basqarmalarynyń kómegine zárý. Eger astyǵyn ótkizgisi kelgen sharýashylyqtar qujattaryn tolyǵymen tapsyrsa, korporatsııa 1-2 kúnniń ishinde tıesili aqshalaryn aýdaryp berýge daıyn. Buǵan bólingen mekemeniń arnaıy qarajaty ázir.
Búgingi kúni korporatsııa satyp alynýǵa tıisti 1 mıllıon tonna astyqtyń 50 paıyzyn ǵana alǵanyn atap ótken onyń sózine qaraǵanda, qosymsha qun salyǵyn tóleıtin aýyl sharýashylyǵyn óndirýshilerden astyqtyń tonnasyn 18500 teńgeden, al qosymsha qun salyǵyn tólemeıtin usaq sharýashylyqtardan 16518 teńgeden, ıaǵnı 12 paıyz tómen baǵamen satyp alýda.
