«Azyq-túlik kelisim shart korporatsııasy» 2 mlrd teńgeden astam somaǵa kóktemgi egin jumystaryn qarjylandyrdy
ASTANA. QazAqparat - «Azyq-túlik kelisim shart korporatsııasy» aýylsharýshylyq taýar óndirýshileriniń kóktemgi egin jumystaryn 2 mlrd teńgeden astam somaǵa qarjylandyrdy. Bul týraly kompanııanyń baspasóz qyzmetinen habarlandy.
Atap aıtqanda, Áleýmettik-kásipkerlik korporatsııalar kepildemesi arqyly aýylsharýashylyq taýar óndirýshilerdiń astyǵyn forvardtyq satyp alý baǵdarlamasy boıynsha korporatsııaǵa 6 mlrd. teńgeden astam somany quraıtyn 800-den asa ótinim kelip túsken.
«Qarjylandyrylatyn egis alqaby 1 mln. gektardan asady. Ótinimderdi qaraý nátıjesinde 2016 jylǵy 12 sáýirdegi jaǵdaı boıynsha 600-den asa ótinim maquldanyp, 4,5 mlrd teńgeden astam somaǵa qarjylandyrý sharttary jasaldy. Onyń ishinde 2 mlrd teńgeden asatyn 200 ótinim qarjylandyryldy», - delingen baspasóz baıanynda.
Málimetterge qaraǵanda, baǵdarlamany bıylǵy jyly bıýdjetten qarjylandyrýǵa 14 mlrd teńge bólingen. Buǵan shamamen 2,3 mln. gektardaǵy egis alqaby qarjylandyrylady. Bul rette egis alqabynyń 1 gektary 6000 teńgege deıingi mólsherde eseptelgen. Azyq-túlik kelisim shart korporatsııasy alatyn komıssııa aldyn ala tólemaqy somasynyń 5% quraıdy.
«Sonymen qatar, Azyq-túlik kelisim shart korporatsııasy ekinshi deńgeıdegi bank kepildemelerin ala otyryp, taýar óndirýshilerdi qarjylandyrý baǵdarlamasyn iske asyrýǵa da kirispek. Buǵan sáıkes, aldyn ala tólemaqy mólsheri 3 surypty bıdaıdyń tonnasyna 20 000 teńgeden, 2 surypty arpa tonnasyna 15 000 teńgeden eseptelinedi. Alynatyn komıssııa aldyn ala tólemaqy somasynyń 5% quraıtyn bolady», - delingen baspasóz baıanynda.
