Azyq-túlik kelisim shart korporatsııasy 1 mln. tonnaǵa jýyq arzandatylǵan astyqty óńirlerge jetkizedi
ASTANA. 30 sáýir. QazAqparat - «Azyq-túlik kelisim shart korporatsııasy» ulttyq kompanııasy» aktsıonerlik qoǵamy óńirlerge arzandatylǵan astyqty jetkizýdi jalǵastyrýda.
Jalpy alǵanda, 2012 jyldyń tamyzynan bastap 2013 jyldyń sáýirine deıingi kezeńde ár tonnasy 28 000 teńgeden belgilengen baǵada 1 mln. tonnaǵa jýyq arzandatylǵan astyq jetkizildi. Bul týraly kompanııanyń baspasóz qyzmetinen habarlandy.
2013 jylǵy 30 sáýirdegi málimetter boıynsha elimizdiń óńirlerine 973 myń tonnadan astam: onyń ishinde astyqty qaıta óńdeıtin uıymdarǵa - 777 myń tonna, qus fabrıkalaryna - 170 myń tonnaǵa jýyq, shoshqa sharýashylyqtaryna 26,5 myń tonna arzandatylǵan astyq jetkizilgen.
Eske salsaq, ótken jyly qurǵaqshylyq saldarynyń aldyn alý maqsatynda Ekonomıkany jańǵyrtý máseleleri jónindegi memlekettik komıssııanyń sheshimimen Aýyl sharýashylyǵy mınıstrligi, «QazAgro» holdıngi» AQ, Qazaqstan astyq óńdeýshiler odaǵy, Astana, Almaty qalalarynyń jáne oblys ákimdikteriniń arasynda 1 surypty unǵa, 1 surypty qalypty nanǵa baǵany turaqtandyrý jónindegi sharalar, sondaı-aq mal sharýashylyǵynda mal basynyń azaıýyn boldyrmaý sharalary jónindegi memorandýmǵa qol qoıylǵan bolatyn. Budan bólek, Azyq-túlik kelisim shart korporatsııasy men Qazaqstan shoshqa ósirýshiler qaýymdastyǵy, Qazaqstan qus ósirýshiler odaǵy jáne ákimdikter arasynda arzandatylǵan astyq jetkizýge memorandýmdar da jasalǵan edi.
Atalǵan memorandýmdardyń sheńberinde 1,6 mln. tonnadan astam, onyń ishinde un tartatyn uıymdarǵa - 1,3 mln. tonna, qus fabrıkalaryna - 264 myń tonnadan astam, shoshqa ósiretin sharýashylyqtarǵa 47 myń tonnaǵa jýyq arzandatylǵan astyq keıinge saqtaldy. Bul rette astyq jergilikti atqarýshy organdarmen anyqtalǵan un tartatyn uıymdarǵa jiberiledi. Qus fabrıkalary men shoshqa ósiretin sharýashylyqtarǵa Qazaqstan qus ósirýshiler odaǵy jáne Qazaqstan shoshqa ósirýshiler qaýymdastyǵymen belgilengen tıisti kólemderde bólinedi.
«Qazaqstan qus ósirýshiler odaǵynyń bastamasyna jáne Ekonomıkany jańǵyrtý máseleleri jónindegi memlekettik komıssııanyń sheshimine sáıkes qus fabrıkalaryna budan buryn bekitilgen 153 myń tonna astyq kólemi 264 myń tonnaǵa ulǵaıtyldy. Jalpy alǵanda, qus ósiretin sharýashylyqtardyń astyqqa jyldyq qajettiligi 500 myń tonnadan asady. Bulardyń jartysynan kóbi Azyq-túlik kelisim shart korporatsııasynyń arzandatylǵan astyǵy esebinen qamtamasyz etiledi», - delingen baspasóz habarlamasynda.
