Azyq-túlik qaýipsizdigin qamtamasyz etý úshin bazar basshylyǵynyń jaýapkershiligin arttyrý kózdelýde - QR AShM
ASTANA. 17 aqpan. QazAqparat - Aýyl sharýashylyǵy mınıstrligi azyq-túlik qaýipsizdigin qamtamasyz etý maqsatynda bazar basshylyǵynyń jaýapkershiligin arttyrýdy qolǵa almaq.
Bul týraly búgin Astanada bazarlardyń birin aralap kórgen QR Aýyl sharýashylyǵy mınıstrliginiń jaýapty hatshysy Evgenıı Aman málim etti.
«Bazarlardaǵy etti birneshe veterınarlyq qyzmet birneshe saty tekseristerden ótkizip jatady. Bul qaýipsizdik úshin qajet, alaıda ol jaýapkershilikti qamtamasyz ete almaıdy jáne kásipkerlerge úlken júk túsiredi. Sondyqtan olardyń sanyn qysqartyp, bazar basshylyǵynyń jaýapkershiligin arttyrý josparlanýda. Bul birqatar normatıvtik ózgertýler men tolyqtyrýlardy engizýdi talap etedi», - dedi ol.
Onyń aıtýynsha, atalmysh ózgerister álemde bar tájirıbelerge súıenip jasalmaq.
Vedomstvo hatshysynyń atap ótkenindeı, keıbir jergilikti jerlerde veterınarlyq qyzmet atymen joq. Mınıstrliktiń endigi maqsaty barlyq aýyldyq okrýgterdi bilikti veterınarlyq dárigerlermen qamtamasyz etý bolyp otyr.
«Júıe belgili bir deńgeıde jumys istep jatyr. Alaıda ony jetildirý kerek jáne tıimdiligin arttyryp, halyq úshin qaýipsizdigin qamtamasyz etý qajet», - dep atap ótti E. Aman.
Jaýapty hatshynyń málimeti boıynsha, QR Aýyl sharýashylyǵy mınıstrligi jyl saıyn 10 mıllıonnan astam memlekettik qyzmet túrlerin kórsetetin kórinedi.
«Sondyqtan jemqorlyqtyń óristeýine keń alań berilgen. Soǵan baılanysty atalmysh qyzmetterdi reglamentteý, standartızatsııalaý, olardy elektrondy formatqa aýystyrý, ruqsat berý protsedýralaryn qysqartý boıynsha keshendi ári júıeli sharalar qabyldanýda», - dep túıindedi sózin E. Aman.
