Azyq-túlik qaýipsizdigi jónindegi joba boıynsha Parlamentte kelisim komıssııasy qurylady
ashanyń 4-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine azyq-túlik qaýipsizdigi máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen túzetýlerdi talqylady.
Ol boıynsha qos palata arasynda kelispeýshilikterdi eńserý úshin kelisim komıssııasyn qurý týraly sheshim qabyldandy, dep habarlaıdy QazAqparat.
Esterińizge sala keteıik, atalǵan zań jobasynyń maqsaty elimizdiń azyq-túlik qaýipsizdigin qamtamasyz etý máseleleri boıynsha zańnamany jetildirý bolyp tabylady. Sondaı-aq jobada respýblıka halqynyń azyq-túlik taýarlarymen ózin ózi qamtamasyz etýiniń jetkilikti deńgeıine qol jetkizý sharalary zań júzinde qarastyrylady. Qujatta elimizdiń azyq-túlik qaýipsizdigi máselesine erekshe nazar aýdarylyp, bul baǵyttyń basymdyǵyn eskere otyryp, ony ulttyq qaýipsizdik turǵysynda qarastyrý kózdelgen. Atap aıtqanda, qujatta azyq-túlik qaýipsizdigine tóngen qater ulttyq qaýipsizdikke tóngen qater retinde qarastyrylady. Osyǵan oraı, qoldanystaǵy «Ulttyq qaýipsizdik týraly» zańǵa «azyq-túlik qaýipsizdigi» týraly uǵym engiziledi jáne táýelsiz memlekettiń azyq-túligin saqtaý úshin otandyq agroónerkásip keshenin ornyqty damytý ulttyq múddeler tizimine engiziletin boldy.
Májilis maquldaǵan zań jobasyna Senat 53 túzetý engizgen. «Jumys tobyndaǵy talqylaý barysynda senatorlardyń 13 ustanymymen kelistik. Qalǵan 40 túzetýdi kelisim komıssııasynyń qaraýyna usynbaqshymyz», dedi joba boıynsha túsinik bergen depýtat Raýan Shaekın. Qos palata arasyndaǵy kelisim komıssııasynyń quramyna depýtat Shalataı Myrzahmetov, Ermuhamet Omarov jáne Raýan Shaekınder saılandy.
