Azyq-túlik qaýipsizdigi jónindegi Islam Uıymynyń shtab-páteri Qazaqstanda ornalasady
Aýyl sharýashylyǵy mınıstri Asyljan Mamytbekovtiń aıtýynsha, 2011 jyly 28 maýsymda Astanada ótken Islam Yntymaqtastyǵy Uıymy Syrtqy ister mınıstrleriniń keńesiniń sessııasynda Prezıdent N. Nazarbaev Uıym sheńberinde azyq-túlik boıynsha ózara kómek týraly bastama jasaǵan bolatyn. «Azyq-túlik resýrstaryn eksporttaıtyn memleket retinde mundaı Uıymnyń shtab-páterin Qazaqstanda ornalastyrý usynylǵan edi. Bul bastamanyń aıasynda Qazaqstannyń usynysy Islam Yntymaqtastyǵy Uıymynyń barlyq múshe memleketteri tarapynan qoldaý tapty», - dedi Asyljan Mamytbekov.
Onyń aıtýynsha, Azyq-túlik qaýipsizdigi jónindegi Islam Uıymynyń jarǵysy 2013 jyldyń 10 jeltoqsanynda Konakrıde on toǵyz memlekettiń ókilderimen qabyldanǵan.
«Uıymnyń shtab-páterin ózinde qabyldaı otyryp, Qazaqstan Islam Uıymynyń aıasyndaǵy azyq-túlik qaýipsizdigi úılestirýshi rólin ózine alady», - dedi mınıstr.
Tutastaı alǵanda, Azyq-túlik qaýipsizdigi jónindegi Islam Uıymynyń negizgi maqsattarynyń biri múshe memleketterge aýyl sharýashylyǵyn, azyq-túlik qaýipsizdigin tıimdi damytýdyń, shóleıttenýden, orman alqaptarynyń azaıýynan, topyraqtyń erozııasy men sortańdanýynan týyndaǵan problemalardy sheshýdiń jolyn usyný bolyp tabylady. Budan bólek, qajetti shuǵyl jáne gýmanıtarlyq kómekti aıqyndaý, onyń ishinde azyqtúlik qaýipsizdiginiń rezervterin qurý kózdeledi.
