Azyq-túlik qaýipsizdigi jónindegi Islam uıymy Qazaqstannyń eksporttyq áleýetin arttyrady - E. Kósherbaev
Bul týraly búgin Ortalyq kommýnıkatsııalar qyzmetindegi baspasóz máslıhatynda QR Aýyl sharýashylyǵy vıtse-mınıstri Ermek Kósherbaev málim etti.
QR Aýyl sharýashylyǵy mınıstrligi málimetine qaraǵanda, 28 sáýirde Astanada azyq-túlik qaýipsizdigi men aýyl sharýashylyǵyn damytý boıynsha Islam yntymaqtastyq uıymy mınıstrleri konferentsııasynyń jetinshi sessııasy ótedi. Konferentsııa aıasynda Azyq-túlik qaýipsizdigi jónindegi Islam uıymy Bas Assambleıasynyń quryltaıshy sessııasy ótedi. Qurylǵaly otyrǵan uıym keńsesi Astana qalasynda ornalaspaq. Bastapqy úsh jylda uıymdy Qazaqstan basqarady dep kútilýde.
«Jetinshi sessııada birinshiden uıymnyń qurylymy qaralady. Osy rette hatshylyqta jumys isteıtin adamdardyń tizbesi talqylanady»,-dep atap ótti E. Kósherbaev.
Bul birinshi kezekte ekonomıkalyq uıym ekenine toqtalǵan ol, osy baǵytta uıymnyń atqaratyn negizgi qyzmetteri sáýirdiń aıaǵynda belgili bolatynyn sóz etti.
Onyń sózine qaraǵanda, sessııada qarjylyq rásimderdiń tártibi, sondaı-aq bes jylǵa arnalǵan uıym bıýdjeti bekitilmek.
Vıtse-mınıstr uıymnyń qurylýy Qazaqstanǵa eksporttyq áleýetin arttyrýǵa múmkindik beretinin aıta kele, «elimiz astyq eksporttaıtynyn bilesizder. Jalpy, AQIU-ny qurý arqyly astyq eksportyn jyl saıyn 1 mln. tonnaǵa arttyrýǵa jol ashylady dep oılaımyz»,-dedi.
AQIU jumysy uıymǵa múshe elderde aýyl sharýashylyǵyn, aýyldyq jerlerdi, azyq-túlik qaýipsizdigin jáne bıotehnıkalyq tıimdi damytý baǵytynda túrli aspektide ozyq tájirıbelerdi engizip, sondaı-aq orman alqaptarynyń azaıýy men shóleıttený máselelerin sheshýge negizdelmek. Sonymen qatar, múshe memleketterge qajetti jedel kómekti anyqtaý men usyný maqsatynda salada baǵalaý jáne monıtorıng júrgizý josparlanyp otyr. Bul turǵyda azyq-túlik qaýipsizdiginiń qory eskerilýde.
Aıta keteıik, bul uıymdy qurý bastamasyn 2011 jyly IYU Syrtqy ister mınıstrleri keńesiniń 38-sessııasynda Memleket basshysy N. Nazarbaev kótergen bolatyn. Eki jyldan keıin IYU-ǵa múshe memleketterdiń sarapshylary Astanada ótken úkimetaralyq sarapshylyq otyrysta jarǵylyq qujattyń jobasyn kelisti. Búginde qurylǵaly otyrǵan uıymnyń jarǵysyn IYU quramyndaǵy 24 memleket bekitip, qol qoıdy.