Azyq-túlik ınflıatsııasy 19,7% deıin jedeldegen - Ulttyq bank
Bul týraly QR Ulttyq banki tóraǵasynyń orynbasary Aqyljan Baımaǵambetov aıtyp berdi.
«Shildede Qazaqstanda aılyq ınflıatsııanyń ósý qarqyny áli de joǵary deńgeıde bolǵanmen, bir aı burynǵy 1,6%-dan 1,1%-ǵa deıin baıaýlady. Shildede orta eseppen sońǵy 5 jylda aılyq ınflıatsııa 0,3%-dy qurady», - dedi Aqyljan Baımaǵambetov Úkimettiń búgingi otyrysynda.
Onyń aıtýynsha, baǵa ósýiniń baıaýlaýy jemis-kókónis ónimderiniń maýsymdyq arzandaýynyń áserinen boldy. Júrgizilip jatqan yntalandyrýshy fıskaldyq saıasat aıasynda ekonomıkada saqtalyp otyrǵan suranys, geosaıası shıelenis pen naryqtardaǵy teńgerimsizdikter kezinde ekonomıkanyń syrtqy jáne ishki sektorlaryndaǵy qysym tutyný baǵalarynyń ósýin baıaýlatýǵa kedergi bolady.
Ulttyq banktiń habarlaýynsha, shildede jyldyq ınflıatsııa 14,5%-dan 15%-ǵa deıin ósti. Bul rette ınflıatsııaǵa azyq-túlik baǵasynyń ósýi eń kóp úles qosty. Mysaly, azyq-túlik ınflıatsııasy 19,2%-dan 19,7%-ǵa deıin, azyq-túlikke jatpaıtyn ınflıatsııa 13,2-dan 14,2%-ǵa deıin jedeldegen.
«Aqyly qyzmetter ınflıatsııasy bir aıda salystyrmaly túrde joǵary óskenine qaramastan, 2021 jylǵy joǵary bazanyń áserine baılanysty 9,2% deńgeıinde ózgerissiz qaldy. Osylaısha, ekonomıkadaǵy ınflıatsııalyq qysym joǵary deńgeıde saqtalyp otyr. Inflıatsııanyń jáne ınflıatsııalyq kútýlerdiń jedeldeýin, olardyń turaqtylyǵyn, suranysty fıskaldyq yntalandyrýdy jáne syrtqy proınflıatsııalyq jaǵdaıdy eskere otyryp, Ulttyq Bank bıylǵy 25 shildede bazalyq mólsherlemeni 14%-dan 14,5%-ǵa deıin kóterdi. Bul aldaǵy jyly ınflıatsııaǵa birtindep áser etetin bolady», - dedi A. Baımaǵambetov.
