Azyq-túlik baǵasyna monıtorıng jasaýǵa halyqty tartý qajet - mınıstr

NUR-SULTAN. QazAqparat - Baǵa monıtorıngi jáne elektrondyq saýdany damytýǵa halyqty tartý qajet. Bul týraly búgin Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Baǵa monıtorıngi jáne elektrondyq saýdany damytýǵa halyqty tartý qajet. 2019 jyldyń jeltoqsanynda Qaraǵandy qalasynda baǵaǵa monıtorıng jasaıtyn PRICE SCANNER mobıldi qosymshasy iske qosyldy. Baǵalar týraly barlyq derekter azamattardan alynǵan aqparatqa negizdelgen», - dedi ol.

Mınıstr munan bólek elektrondyq saýda alańdaryn iske qosý boıynsha jumystar júrgizilip jatqanyn aıtty.

«Máselen, búgingi kúnde Ońaı Bazar jáne Happy food Astana sııaqty jeliler ashyldy. Olar ónimdi óndirýshiden tutynýshyǵa deıin jetkizý tizbegin ońtaılandyrýǵa jáne halyq úshin taýarlardyń qoljetimdiligin arttyrýǵa múmkindik beredi. Mysaly, dúkenderde kartoptyń bólshek baǵasy 100-den 150 teńgege deıin bolsa, elektrondy alańdardyń baǵasy shamamen 75 teńgeni quraıdy»,- dedi Baqyt Sultanov.