Azyq-túlik baǵasyn ustap turý boıynsha bosańsýdyń reti joq -Ómirzaq Shókeev
ASTANA. Shildeniń 17-si. QazAqparat /Rýslan Ǵabbasov/ - Búgin Úkimette ótken selektorlyq keńeste Premer-Mınıstrdiń birinshi orynbasary Ómirzaq Shókeev Jambyl oblysynda keıbir azyq-túlik taýarlarynyń qymbattaýy máselesin tez arada retke keltirýdi tapsyrdy.
Shildeniń 15-indegi monıtorıng boıynsha, birinshi surypty bir keli unnyń baǵasy ShQO-da - 2 teńgege, Jambyl oblysynda - 2 teńge, Qyzylorda oblysynda 1 teńgege ósken, Pavlodar oblysynda kerisinshe - 1 teńgege, sondaı-aq Astana men Almaty qalalarynda 5 teńgege tómendegen.
Ó. Shókeevtiń aıtýynsha, qanttyń baǵasy Aqmola oblysynda - 1 teńge, Aqtóbe oblysynda - 14, ShQO-da - 4, Qostanaıda - 10, Qyzylorda oblysynda 17 teńgege tómendep otyr. Jalpy respýblıka boıynsha 4 teńgege arzandaǵan. Sonymen qatar kúrishtiń baǵasy Mańǵystaý oblysynda - 13 teńgege, al Almatyda 27 teńgege tómendegen.
Astanada arpa jarmasy - 17 teńgege, untaq jarma - 40 teńgege, sondaı-aq sarymaı 37 teńgege joǵarylaǵan. «Untaq jarma kelisine 91 teńge bolsa, qazir 130 teńge. Eki aptanyń ishinde nege osynsha baǵa sharyqtap ketken. Menińshe, osy jarma túrlerin elordaǵa bir kompanııa tasymaldap otyr. Bul máseleniń sheshimin tabý kerek», dep tapsyrdy vıtse-premer Astana ákimdigine.
Atap aıtqanda, azyq-túlik taýarlarynyń (sút, sarymaı, aıran, irimshik, sábiz) baǵasy negizinen Jambyl oblysynda joǵarylaǵan.
Ó. Shókeev óńirlerdegi azyq-túlik máselesi boıynsha jergilikti atqarý organdaryna tıisti sharalardy qabyldaýdy júkteı kele, «bul málimetterdiń barlyǵyn ákimdikterge tapsyryp, aldaǵy seısenbide jańa aqparatty jınańyzdar. Ákimderge eskertińizder, seısenbide tıisti shara qabyldamaǵandarǵa tártiptik sharalardy qoldanamyz»,-dep qadap aıtty.
«Bosańsýdyń reti joq. Kúndelikti barlyǵyn baqylaýda ustaý kerek. Ásirese, osy máseleni qadaǵalaıtyn ákim orynbasarlarynyń jumysy qarqyndy bolýy tıis»,- dedi Úkimet basshysynyń birinshi orynbasary.
