Azyq-túlik baǵasyn turaqtandyrý: avtodúkender men kontrmagnıt bazarlar ashý usynylady

ASTANA. QazAqparat – Avtodúkender men kontrmagnıt bazarlar ashý azyq-túlik naryǵyn rettep, baǵany turaqtandyrýǵa yqpal etedi. Bul usynys Premer-Mınıstrdiń orynbasary - saýda jáne ıntegratsııa mınıstri Serik Jumanǵarınniń tóraǵalyǵymen ótken keńeste qaraldy, dep habarlaıdy QazAqparat Úkimettiń resmı saıtyna silteme jasap.

Bazarlar jumysyn órkenıetti formatqa kóshirý sheńberinde Almaty qalasy men Almaty oblysynda kontrmagnıt bazarlaryn qurý usynylady. Bul naryq qyzmetin retke keltirýge, kóleńkeli aınalymdy qysqartýǵa, salyq túsimderin arttyrýǵa, otandyq óndirýshilerdiń ótkizý naryqtaryna tikeleı qol jetkizýin qamtamasyz etýge múmkindik beretin A klasyndaǵy saýda ortalyqtary bolmaq.

«Naryqtardy jańǵyrtý baǵdarlamasy sheńberinde josparlanǵan, 2023 jylǵy 1 qańtarǵa deıin Astana, Almaty jáne Shymkent qalalarynda aıaqtalýy tıis jumys iske asyrylmaǵan. 2025 jyldyń sońyna deıin 68 bazardy jańǵyrtý mindeti tur, onyń 18-i respýblıkalyq mańyzy bar qalalarda, al qalǵan 50-i óńirlerde ornalasqan. Búgin biz JSQ ázirleýden bastap ýákiletti organdarmen kelisýge deıin, kezeń-kezeńimen merzimderi jáne oryndaýshylary kórsetilgen jol kartasynyń jobasyn daıyndadyq. Barlyq jumysty belgilengen merzimde aıaqtaý qajet», - dedi saýda jáne ıntegratsııa birinshi vıtse-mınıstri Arman Shaqqalıev keńes barysynda.

Sonymen qatar, qazaqstandyq avtoóndirýshiler shyǵarǵan áleýmettik azyq-túlik ónimderin satýǵa arnalǵan avtodúkender, jyljymaly núkteler qurý jobasy usynyldy. Olardyń artyqshylyqtary – statsıonarlyq saýda núktelerinen táýelsizdigi, jyljý múmkindigi, al bul baǵa men qoljetimdilikke aıtarlyqtaı áser etedi. Qoljetimdi baǵamen avtonesıe berý, bólip tóleý baǵdarlamasy qarastyrylyp otyr, shyǵarýshylar qajetti mólsherde daıyndaýǵa ázir. Bul usynystar óńirlerge joldanǵan.