Azyq-túlik baǵasyn ósirgen qostanaılyq dúkender jazaǵa tartylady - ákimdik

QOSTANAI. QazAqparat - Tabıǵı monopolııalardy retteý jáne básekelestikti qorǵaý komıteti birinshi kezektegi azyq-túlik taýarlaryn baqylaýda ustaý jóninde úndeý jarııalady, dep habarlaıdy QazAqparat oblys ákimdiginiń baspasóz qyzmetine silteme jasap. 

Dúken sórelerindegi azyq-túlik baǵalary qubylyp tur. Bul týraly búgin QR UEM Tabıǵı monopolııalardy retteý jáne básekelestikti qorǵaý komıteti ókilderiniń qatysýymen ótken jıynda aıtyldy. Osy máselege baılanysty Ulttyq ekonomıka mınıstrligi, Qostanaı oblysy ákimdigi jáne «Atameken» Ulttyq kásipkerler palatasy arasynda úshjaqty kelisimge qol qoıyldy. Maqsat - baǵany baqylaýda ustaý. Sol sebepti úsh tarap kásipkerlik sýbektilerindegi taýar baǵalarynyń ósýine jol bermeý týraly birlesken úndeý jarııalady. 

«Tabıǵı monopolııalardy retteý jáne básekelestikti qorǵaý komıteti men «Atameken» Ulttyq kásipkerler palatasy saýda jáne qyzmet salalarynyń kásiporyndaryna úndeý tastaıdy. Birinshi kezekte qajet azyq-túlik taýarlaryna, joǵary tutynýshylyq suranysqa ıe (avtomobılder, uıymdastyrýshylyq tehnıka, turmystyq hımııa zattary jáne t.b.), mýltıplıkatıvtik áseri bar azyq-túlikke jatpaıtyn taýarlarǵa (munaı ónimderi, taýarlyq jáne suıytylǵan gaz, kómir, mazýt jáne t.b.) baǵany turaqtandyrýǵa shaqyramyz. Sondaı-aq, otandyq taýaróndirýshilerge tutynýshylardy dúrligý jáne narazylyqqa ıtermelemeı, qalypty jumys rejımin saqtaý mańyzdy. Alypsatarlyq faktileri jáne taýarlardy óndirý men ótkizýdi negizsiz shekteý («Básekelestik týraly» QR Zańynyń 10, 11-baptary) boıynsha naryq sýbektileriniń kelisilgen is-áreketterine tyıym salynady. Mundaı is-áreketterdi jasaý barlyq monopolııalyq tabysty tárkilep, 3%-dan 5%-ǵa deıin aınalym aıyppuldaryn salýǵa ákep soǵady. Budan basqa, atalǵan buzýshylyqtar úshin qylmystyq jaýapkershilik kózdelgen» delingen úshjaqty úndeýde.  

Monopolııaǵa qarsy organdardyń qyzmeti de ózgerdi. Endi atalǵan uıym mamandary ákimdikter janynan qurylǵan baǵa baqylaý boıynsha jedel shtabtardyń quramyna kiredi. Tergeýlerden bólek, monopolııaǵa qarsy organ negizgi áleýmettik mańyzy bar taýar baǵalaryna kún saıyn monıtorıng júrgizip otyrady. Ulttyq kásipkerler palatasy óńirlik kásipkerler palatasynyń kúshimen sol shtabtarǵa óz mamandaryn qosady. Olardyń bıznes-qoǵamdastyqtarda, saýda jelilerinde, bazarlarda baǵalardy negizsiz kóterýine jol bermeý jumystaryn uıymdastyrady. 

Turǵyndar baǵalardyń kúrt ósý faktileri boıynsha Tabıǵı monopolııalardy retteý jáne básekelestikti qorǵaý komıteti Qostanaı oblysy boıynsha departamentine 8 [phone] senim telefony arqyly habarlasyp, sondaı-aq resmı ótinishpen de júgine alady.