Azyq-túlik baǵasyn qalypty ustap turýǵa qatysty sheshimder jabyq túrde qabyldanyp jatyr

Búgin QR Parlamenti Senatynyń jalpy otyrysynda «2012-2014 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattar saýalyna jaýap bergen Úkimet basshysynyń birinshi orynbasary Ómirzaq Shókeev osylaı málim etti.

Otyrys barysynda senator Qýanysh Aıtahanov azyq-túlik baǵasyna qatysty másele kóterdi. «Osydan eki jyl buryn Parlamentte qabyldanǵan zań boıynsha tabysy az azamattarǵa azyq baǵasy qymbattaǵan shaqta memlekettik qoldaý kórsetiledi, osyǵan baılanysty sýbsıdııa berý týraly norma bar edi. Odan keıingi jyldary Úkimet áleýmettik azyq-túlik taýarlarynyń tizbesin bekitti. Endeshe azyq baǵasynyń qymbattaýyna oraı áleýmettik az qamtylǵan azamattarǵa qandaı kómekter kórsetilýde?», - dep suraǵan bolatyn senator.

Buǵan qatysty Ómirzaq Shókeev Úkimet eldegi azyq-túlik baǵasyn únemi baqylaýda ustap otyrǵanyn atap ótti. «Áleýmettik mańyzy bar taýarlar tizbesi bekitildi. Soǵan qatysty biz rynokta qandaı baǵa ornaǵan sátten bastap naryqqa aralasýymyz kerektigin de bilemiz. Bylaısha aıtqanda, tıisti sheshimderdiń barlyǵy jabyq túrde qabyldanýda. Rasymen, máseleni ashyq túrde talqylaýdy jónsiz sanaımyz. Óıtkeni, ashyq qabyldanǵan sheshimder naryqty, onyń ishinde baǵany qozǵaltýy múmkin», - dedi Ó. Shókeev. Onyń aıtýynsha, budan bólek baǵany ýysta ustaý úshin barlyq oblystarǵa, áleýmettik korporatsııalarǵa kredıt bólingen. «Ákimderdiń qolyna úlken qarjy berdik. Jergilikti bılik osy qarjyǵa qazirgi kúni áleýmettik mańyzy joǵary ári asa qajetti taýarlardy satyp alyp, ózderinde qystaı saqtap, kóktemgi maýsymda taýarlardyń baǵasyn ustap turýǵa áser etýleri shart. Ondaı múmkindikter barshylyq», - dedi Ó. Shókeev.