Ázirge aıyppul joq: Almatyda LEZ aımaǵy synaqtan ótkizile bastady
ALMATY. KAZINFORM – Almatyda 28 sáýirden bastap tómen emıssııaly aımaqtyń (LEZ) pılottyq jobasy iske qosyldy. Bul týraly qalalyq Ekologııa jáne qorshaǵan orta basqarmasynyń ókilderi habarlady.
Pılottyq rejım Bógenbaı batyr, Jeltoqsan kóshesi, Abaı dańǵyly jáne Dostyq dańǵyly arasynda ornalasqan aýmaqta iske qosyldy. Jobanyń operatory — «Almaty Parkıng» mekemesi. Qazirgi kezeńde júıe synaq rejıminde jumys isteıdi. Júrgizýshiler úshin qozǵalysqa shekteý, aıyppul nemese kirý aqysy qarastyrylmaǵan.
— Negizgi maqsat — tsıfrlyq ınfraqurylymdy synaqtan ótkizý jáne kólik aǵyny men olardyń aýa sapasyna áseri týraly derekter jınaý, — dep túsindirdi vedomstvo ókilderi.
Synaq rejımi aıasynda birneshe mańyzdy jumys josparlanǵan:
— «aqyldy» kameralardyń, radarlyq sensorlardyń jáne kólikti avtomatty taný júıeleriniń naqty aýa raıy men jol jaǵdaıynda durys jumys isteýin tekserý;
— kólik aǵyny men aýa sapasy datchıkteriniń deregin sáıkestendirip, belgili bir aýmaqtaǵy trafıktiń ekologııaǵa áseri týraly obektıvti kórinis qalyptastyrý;
— derekterdi qorǵaýly arnalar arqyly berý júıesin retteý jáne ІT-mamandar, ekologtar men jol qozǵalysyn basqarý qyzmetteri arasyndaǵy ózara is-qımyldy pysyqtaý. Bul bolashaqta kez kelgen retteýshi sheshim qabyldaýǵa deıin biryńǵaı ári senimdi tsıfrlyq platforma qalyptastyrýǵa múmkindik beredi;
— qalalyq mobıldilikke tereń taldaý júrgizýge jáne «aqyldy qala» strategııasyn ázirleýge qajetti derekter bazasyn qalyptastyrý.
Pılottyq kezeńde negizgi nazar tehnologııalardy shekteý sharalaryn engizbesten synaqtan ótkizýge baǵyttalǵan. Basqarma mamandary bul avtokólik ıelerin shekteý emes, eń aldymen tehnologııanyń tıimdiligin tekserýge baǵyttalǵan jumys ekenin atap ótti. Synaq kezeńi 2026 jyly 31 jeltoqsanǵa deıin jalǵasady.
Eske salaıyq, 2025 jyldyń jeltoqsan aıynda Almaty máslıhaty atmosferalyq aýany qorǵaý qaǵıdalaryn bekitti.
Oǵan deıin Almatyda eski kólikterdiń ortalyqqa kirýine shekteý qoıylatynyn jazǵanbyz.
