Ázerbaıjan men Armenııa bastapqy beıbitshilik kelisiminiń mátinin jarııalady
ASTANA. KAZINFORM — Ázerbaıjan men Armenııa 17 tarmaqtan turatyn parafırlengen beıbitshilik kelisiminiń mátinin resmı túrde jarııalady. Qujat eki eldiń Syrtqy ister mınıstrlikteriniń resmı saıttarynda ornalastyryldy, dep habarlaıdy Kazinform tilshisi.
Kelisimge paraf qoıý rásimi 8 tamyzda AQSh-tyń Vashıngton qalasynda, Ázerbaıjan prezıdenti Ilham Álıev pen Armenııa premer-mınıstri Nıkol Pashınıannyń sapary barysynda ótti.
Qujat mátinine sáıkes, taraptar turaqty jáne ádil beıbitshilikti, tatý kórshilik qatynastardy jáne halyqaralyq quqyqty qurmetteýge nıet bildirdi.
Qujat jobasynda, atap aıtqanda, mynadaı erejeler kózdelgen:
Aýmaqtyq talaptardan bas tartý. Armenııa men Ázerbaıjan bir-biriniń egemendigi men aýmaqtyq tutastyǵyn resmı túrde moıyndaıdy jáne bolashaqta osyndaı talaptar qoımaýǵa mindettenedi.
Kúsh qoldanýǵa tyıym. Eki tarap ta ekijaqty qatynastarda kúsh qoldanýdan nemese ony qoldanamyn dep qorqytýdan bas tartady.
Úshinshi taraptardy qospaý. Eki memlekettiń eshqaısysy ortaq shekara boıynda úshinshi elderdiń qarýly kúshterin ornalastyrmaıdy.
Shekarany delımıtatsııalaý. Eki el arasyndaǵy shekaralar bólek kelisim jáne arnaıy komıssııalardyń jumysy negizinde aıqyndalyp, demarkatsııalanady.
Qaýipterge birlesip qarsy turý. Taraptar separatızmniń, terrorızmniń, ekstremızmniń jáne kemsitýshiliktiń barlyq kórinisterin aıyptaıdy jáne bul qubylystarǵa óz ulttyq ıýrısdıktsııalary aıasynda qarsy kúres júrgizýge mindettenedi.
Halyqaralyq quqyqtyń ústemdigi. Ulttyq zańdar beıbitshilik kelisiminiń erejelerin oryndamaýǵa syltaý retinde paıdalanylmaıdy.
Baqylaý komıssııasyn qurý. Ázerbaıjan men Armenııa kelisim sharttarynyń oryndalýyn qadaǵalaıtyn ekijaqty komıssııa qurady.
Halyqaralyq isterdi qaıtaryp alý. Qujat kúshine engennen keıin bir aı ishinde taraptar bir-birine qarsy halyqaralyq ınstantsııalarda berilgen barlyq sot isteri men shaǵymdaryn qaıtaryp alýǵa jáne jańalaryn bastamaýǵa mindettenedi.
Bolashaqtaǵy yntymaqtastyq múmkindigi. Kelisim ekonomıka, kólik, mádenıet jáne gýmanıtarlyq ózara is-qımyl salalarynda qosymsha kelisimder jasasý múmkindigin qarastyrady.
Beıbitshilik kelisimi ishki quqyqtyq rásimder aıaqtalyp, tıisti habarlamalar almasqannan keıin kúshine enedi. Ol ázerbaıjan, armıan jáne aǵylshyn tilderinde jasaldy, al kelispeýshilik týyndaǵan jaǵdaıda aǵylshyn tilindegi nusqaǵa basymdyq beriledi.
Eske sala keteıik, 8 tamyzda Ázerbaıjan prezıdenti, Armenııa premer-mınıstri jáne AQSh prezıdenti Baký men Erevan arasyndaǵy qatynastardy beıbit jolmen retteý týraly birlesken deklaratsııaǵa qol qoıdy.
Keıin Ázerbaıjan prezıdenti Ilham Álıev AQSh jaǵyna Ázerbaıjan men Armenııa arasyndaǵy beıbitshilik kelisimine qol jetkizýdegi mańyzdy róli úshin alǵys bildirdi.