Azor araldary mańynda 4 myń mashına tıelgen keme sýǵa batyp ketti
NUR-SULTAN. QazAqparat - Portýgalııanyń Azor araldary mańynda órtengen kólikterdiń iri partııasy tıelgen Felısıtı Eıs atty keme keshe sýǵa batyp ketti. Bul týraly QazAqparat Bloomberg agenttigine silteme jasap habarlaıdy.
Kompanııa ókili - keme operatorynyń aıtýynsha, Felısıtı Eısti sý basý kútpegen jerden bolǵan, kemedegi órt bir aptadan astam ýaqytqa sozylǵan.
Marine Trafficportalynyń habarlaýynsha, Germanııanyń Emden portynan 10 aqpanda shyqqan kemeniń sońǵy baratyn jeri - Devısvıll porty (Rod-Aılend, AQSh). Atlant muhıtynda Azor arhıpelagynyń bir bóligi Faıal araly mańynda keme órtenip bastady dep 16 aqpanda habarlanǵan. Portýgalııa áskerı-teńiz kúshteri 22 ekıpaj múshesin sol kúni evakýatsııalady.
Azor aralyndaǵy port sheneýnikteriniń Reuters agenttigine aıtýynsha, órt sóndirýshiler jalyndy Felısıtı Eıstiń syrtynan ǵana óshirýge tyrysqan. Óıtkeni janarmaı tsısternalarynyń jarylýy yqtımaldyǵy batyl áreketke barýǵa bóget keltirdi.
Aıta ketsek, Felicity Ace bortynda Porsche, Audi jáne Bentley sııaqty brendterdiń 4000-ǵa jýyq kóligi tıelgen.
Foto: Reuters
