Az qamtylǵan otbasylarǵa oqý quraldaryn alýǵa qarjylaı qoldaý kórsetiledi

ASTANA. KAZINFORM – Jeke mektepterde oqıtyn az qamtylǵan otbasy balalaryna memleket tarapynan oqý quraldaryn alýǵa qarjylaı qoldaý kórsetiledi, dep habarlaıdy Oqý-aǵartý mınıstrligi.

Búgin QR Parlamenti Senaty bilim jáne bala quqyqtaryn qorǵaý máseleleri jónindegi zańdy maquldady. QR Oqý-aǵartý mınıstrligi bastamashylyq etken jańa zań jobasynda jekemenshik mektepterde osal otbasylar sanatyndaǵy balalarǵa áleýmettik kómek kórsetýdi engizý kózdelgen.

Zań jobasynda bes novella usynyldy, onyń bireýi jekemenshik mektepterde oqıtyn az qamtylǵan otbasylar balalaryna qatysty. Onda eń tómengi kúnkóris deńgeıinen tómen emes mólsherde qajetti mektep kerek-jaraqtarymen qamtamasyz etýge baǵyttalǵan normalar kózdelgen.

— Buǵan deıin kómek tek memlekettik mektepterdiń oqýshylaryna ǵana beriletin, al endi jeke mektepterde oqıtyn balalar da osyndaı kómek alatyn bolady. Bul mekteptiń menshik nysanyna qaramastan, barlyq balalar úshin bilim berýdiń teń múmkindikterin qamtamasyz etýge baǵyttalǵan mańyzdy qadam, — dep atap ótti QR Oqý-aǵartý vıtse-mınıstri Edil Ospan.

Aıta keteıik, bıylǵy jyly áleýmettik osal otbasylardan shyqqan 510 myńnan astam bala memleketten kıim-keshek, oqý quraldaryn satyp alý úshin qarjylaı qoldaý aldy. Buǵan deıin Oqý-aǵartý mınıstrligi kómek kórsetý mehanızmin jaqsartý maqsatynda ata-analardyń esepshottaryna qarajat aýdarý sharalaryn engizgen edi. Kómek alý úshin ata-ana aldymen balasynyń oqıtyn mekemesine tıisti ótinish berýi qajet.

Aıta keteıik, buǵan deıin Jezqazǵanda 400 oryndyq Oqýshylar saraıy salynatyny aıtyldy.