Ázıza Toqasheva «Miss Union Fashion-2019» baıqaýynda óner kórsetedi
NUR-SULTAN. QazAqparat - «Miss Intercontinental Kazakhstan-2018» júldesiniń ıegeri Ázıza Toqasheva Ózbekstanda ótetin IV Halyqaralyq «Miss Union Fashion-2019» baıqaýynda Qazaqstannyń namysyn qorǵaıdy, dep habarlaıdy QazAqparat tilshisi.
24 jastaǵy boıjetken halyqaralyq baıqaýǵa birinshi ret qatysyp otyrǵan joq. Osydan bir jyl buryn Fılıppınde ótken «Miss Intercontinental 2018» sán baıqaýynda da baq synaǵan edi. Al aldaǵy «Miss Union Fashion-2019» baıqaýy Tashkentte 25 sáýirde ótkiziledi.
Atalmysh baıqaýǵa Azııa, Afrıka, Eýropa elderinen ókilder qatysatynyn aıta ketý kerek. Árbir qatysýshy óz stılinde eliniń mádenıeti men dástúrin pash etedi. Tóreshiler qatysýshylarǵa úsh baǵyt boıynsha - syrtqy kelbeti, ıntellektýaldyq qabileti men ulttyq mádenıetin tanystyrý talaptary boıynsha baǵa beredi. Baıqaýdyń tártibine sáıkes, saıysqa 16-29 jas aralyǵyndaǵy boıjetkender qatysa alady.
Baıqaý sahnasynda Reseı, Belarýs, Bashqurtstan, Izraıl, Qazaqstan, Tájikstan, Tyva Respýblıkasy men Ýkraına elderiniń sulýlary baq synaıdy.
Halyqaralyq shara aıasynda Ózbekstan, Qazaqstan, Ázerbaıjan men Ulybrıtanııa elderi dızaınerleriniń kollektsııalary kórsetiledi.
