Azııalyq Para oıyndar-2018: Otan abyroıyn otyryp oınaý voleıbolynan qorǵaǵan sportshylar

El senim artqan sportshylarmen birge otyryp oınaý voleıbolynan Qazaqstan quramasynyń da altyn medalǵa úmiti zor. Qytaı men Iran sekildi kil myqtylarymen bul kúnde terezesi teń dárejede óner kórsetetin ulttyq quramamyz álemniń úzdik ondyǵyna enedi. QazAqparat tilshisi jarys aldynda erik-jigeri erek, rýhy asqaq sportshylarmen kezdesip, ulttyq quramanyń bas bapkeri Baýyrjan Taqaýovpen áńgimelesip qaıtty.

«Basty qarsylastarymyz - Qytaı men Iran»

Otyryp oınaý voleıbolynan ulttyq quramamyz búgingi kúni elordadaǵy Paralımpıadalyq jattyqtyrý ortalyǵynda daıyndalyp jatyr. Álemdik standartqa saı biregeı ortalyq QR Ulttyq paralımpıadalyq komıtetiniń prezıdenti Qaırat Boranbaevtyń qoldaýymen salynǵan. Komandanyń bas jattyqtyrýshysy Baýyrjan Taqaýovtyń aıtýynsha, Qazaqstanda otyryp oınaý voleıboly 1987 jyldan beri bar eken. 1991 jyldan 1999 jylǵa deıin belgili bapker Jánibek Saýranbaev osy sport túrinen Qazaqstan quramasyn jattyqtyryp, komanda 1994 jyly Beıjińde, 1998 jyly Taılandta ótken Azııa oıyndarynyń jeńimpazy atanǵan. 2002 jyly Koreıanyń Pýsan qalasynda ótken Azııa oıyndarynda kúmis medalǵa ıe bolǵan.

«Ol kezdegi oıynshylardyń bári jasy kelgennen keıin sporttan ketti. Búgingi kúni bizdiń ulttyq quramanyń negizgi bóligin Atyraý komandasynyń sportshylary quraıdy. Onyń ishinde úsheýi Qyzylordadan, qalǵany túgelimen Atyraýdyń jigitteri. 2009 jyly jastar arasynda ótken Álem chempıonatynda bizdiń komanda qola júlde jeńip aldy. 2010 jyly Amerıkanyń Oklahoma shtatynda ótken Álem chempıonatynyń jeńimpazy atandyq. Qazirgi tańda bizdiń komanda álemdik dárejede úzdik ondyqtyń qatarynda. Kúni keshe Álem chempıonatynda toǵyzynshy oryn alyp, Eýropanyń azýly úsh komandasy, sonyń ishinde Paralımpıada oıyndarynyń qola júldegeri Germanııa quramasyn, Gollandııa men Horvatııany uttyq», - deıdi quramanyń bas bapkeri.

Otyryp oınaý voleıbolynyń sańlaqtary qazirgi tańda Parazıada oıyndaryna qyzý daıyndalyp jatyr. Jatyn oryny men tamaǵynyń bári de biregeı ortalyqta qarastyrylǵan. Sátin salsa, 1 qazan kúni sportshylar saparǵa attanyp ketpek. Álbette, kez kelgen sport túrinen álemniń úzdik degen komandalary bar. Baýyrjan Taqaýovtyń aıtýynsha, ulttyq quramanyń maqsaty - otyryp oınaý voleıbolynan Iran, Qytaı, Irak, Japonııa jáne Koreıa komandalaryn jeńý. Aıta keterligi, Iranda bul sport óte júıeli túrde jolǵa qoıylǵan. Ol elde dál osyndaı otyryp oınaý voleıbolynan 130 komanda bar eken.

«Amandyq bolsa, jigitterimiz lıtsenzııa alyp, Paralımpıada oıyndaryna qatysady degen úmittemiz. Iran Álem chempıonatynda top jaryp, lıtsenzııa alyp qoıdy. Endi osy Jakartada ótetin Parazıadada bir lıtsenzııa beriledi. Sodan úmit bar. Ulttyq qurama sapynan 12 sportshymyz el namysyn qorǵaıtyn bolady. Jalpy, Jakartada on komanda bas júldege talasady», - deıdi bapker.

Baýyrjan Taqaýovtyń aıtýynsha, ulttyq qurama sapyndaǵy sportshylardyń bári de bir kezde on eki múshesi saý azamattar bolǵan. Alaıda taǵdyr jazýymen biri kólik apatyna, endi biri taǵy basqa oqys oqıǵaǵa tap bolǵan adamdar. Sonyń biri Erik Qasqabaev jeti jasynda mektepten qaıtyp bara jatyp poıyzdyń astyna túsip qalǵan eken. Taǵdyr tálkegine tap bolsa da, bala kezden sportqa qumar Erik búgin, mine, ulttyq qurama sapyndaǵy úzdik sportshylardyń biri bolyp otyr.

«Osy jasqa deıin birshama saıystarǵa qatysyp, ulttyq qurama sapynda óner kórsetý baqyty buıyrdy. Azııa oıyndarynda osymen tórtinshi ret baǵymyzdy synaǵaly otyrmyz. Bizdiń quramanyń oıynshylarynyń bári jas. Jarystar men sporttyq saparlar bizde jıi bolyp turady. Turaqty túrde jarystarǵa qatysyp turmasaq, komandamen qaıta beıimdelý óte qıynǵa túsedi. Qarsylastarymyz kúnine eki ret 6-7 saǵattan daıyndalatynyn estidik. Chempıon ataný úshin kóp ter tógý kerek», - deıdi Erik.

Jasy otyzdan asyp ketken Erik bala kezinde Baýyrjan Taqaýovty kezdestirgeli janynan qalmaǵan.

«Otyryp oınaý voleıbolynyń kádimgi voleıboldan kóp aıyrmashylyǵy joq. Dop beris kezinde blok qoıýǵa bolady. Setkanyń bıiktigi 1 metr 15 santımetr. Bizdiń eń boıshań sportshy Aleksandr Demeýovtiń boıy - 2 metr 18 santımetr. Álekemiz, shabýylǵa da myqty. Altyn medal alýǵa barymyzdy salamyz», - deıdi Erik Qasqabaev.

Koreıa bapkeri: Qazaqstandy arnaıy tańdadyq 

 Paralımpıadalyq jattyqtyrý ortalyǵyna kirgenimizde ulttyq qurama sportshylarymen birge Ońtústik Koreıanyń Kengıdo qalasynan kelgen sportshylar da júr eken. Estip bilgenimizdeı, Qazaqstan Respýblıkasynyń Ulttyq paralımpıada komıteti men Ońtústik Koreıa eliniń «Kengı-do» sporttyq qaýymdastyǵy yntymaqtastyq týraly kelisimge kelip, osy kelisim aıasynda tájirıbe almasý júrip jatyr. Ulttyq paralımpıada komıtetiniń menedjeri Raýan Sátjanovtyń aıtýynsha, osyǵan deıin Qazaqstannyń otyryp oınaý voleıbolshylary Ońtústik Koreıaǵa baryp oqý-jattyǵý jıynynan ótip kelgen. Endigi kezekte koreıalyq sportshylar Astanaǵa kelip otyr.

Kengıdo qalasynan kelgen, atalmysh qaladaǵy otyryp oınaý voleıbolynan jasaqtalǵan quramanyń bas bapkeri Je Jıń Vondy sózge tarttyq. Onyń aıtýynsha, otyryp oınaý voleıbolynan Qazaqstan úzdikterdiń qatarynda bolǵandyqtan, ózara yntymaqtastyqqa koreıalyqtardyń ózderi múddelik tanytqan.

«Sońǵy úsh kúnde Qazaqstan sportshylarynyń ónerin úzdiksiz tamashalap kelemin. Kúni keshe Baýyrjan Taqaýovpen birshama tildestik. Bizdiń sportta eń myqty komandalar Qytaı men Iran desek te, meniń oıymsha, Qazaqstan quramasynyń daıyndyǵyna qarap otyryp, myqty komandalardy uta alatynyna kózim jetip otyr», - deıdi ol.

Ońtústik Koreıadan kelgen bapkerden óz elinde múmkindigi shekteýli sportshylarǵa memleket tarapynan qanshalyqty qoldaý kórsetiletinin surap kórdik.

«Bizdiń elde de paralımpıadashylarǵa arnalǵan sporttyq ortalyqtar barshylyq. Koreıada árbir paralımpıadashy sportshynyń óziniń jumysy bar. ıAǵnı, sporttyq jıyn bastalǵan kezde olarǵa táýliktik nemese aılyq aqy berilip, jarysqa jiberiledi. Ulttyq quramalarda da solaı. Dese de, sizderdegideı paralımpıada oıyndarynda joǵary júldege qol jetkizgender qarapaıym sportshylarǵa beriletin syıaqyǵa teń soma alady», - deıdi Je Jıń Von.

«Parazıada oıyndarynan qur qaıtqan emespiz»     

Budan keıin Qazaqstan Respýblıkasy Paralımpıada komıtetiniń sport boıynsha menedjeri Raýan Sátjanovpen áńgimelesýdiń sáti tústi. Menedjer atap ótkendeı, Indonezııada Qazaqstannan 93 sportshy otyryp oınaý voleıboly, para paýerlıftıng, júzý, jeńil atletıka, sadaqpen atý, oq atý túrlerinen el namysyn qorǵaýǵa bara jatyr.

«Qazir qansha medalǵa úmitti bolyp otyrǵanymyzdy tap basyp aıta almaımyz. Biraq, qorjynymyz bos kelgen kez bolǵan emes. Biz Azııa sheńberinde básekelestik tanyta alatyn birneshe sport túri bar. Naqtyraq aıtqanda, júzý sportynan bizde altyn medal baryn (Zúlfııa Gabıdýllına) bilesiz. Para paýerlıftıng sańlaqtary da myqty. Rıoda ótken paralımpıada oıyndarynda osy sport túrinen kúmis medalge qol jetkizgen bolatynbyz. Jeńil atletıkadan da úmitimiz zor. Eshqandaı sportshylarymyz álsizdik tanytpasy anyq», - deıdi ol.

Raýan Sátjanov Qazaqstanda Parazıada oıyndarynyń baǵdarlamasyna enbeı qalǵan kóptegen sport túrleri óristep kele jatqanyn aıtady. Máselen, paralımpıadalyq at sportynyń damýy erekshe.

Zań boıynsha Paraazıada oıyndarynda top jarǵan sportshylarǵa Azıada oıyndarynda jeńimpaz atanǵan sportshylarmen birdeı syıaqy berilýi kerek. Mundaı zań elimizde 2014 jyly engizilgen. Endeshe iske sát! El namysyn namysyn qorǵaýǵa ketip bara jatqan sportshylarymyzǵa medaldiń altynyn tileımiz!