Azııalyq oıyndardyń Alaý estafetasy 18 qańtarda Aqtóbege keledi
AQTÓBE. 14 qańtar. QazAqparat /Samal Endibaeva/ - Búgin Aqtóbe oblystyq ákimdiginde aımaq ákimi Eleýsin Saǵyndyqovtyń tóraǵalyǵymen keńeıtilgen keńes ótti. Onda VII qysqy Azııa oıyndarynyń aımaqtyq Alaý estafetasyn uıymdastyrý jáne ony ótkizý máseleleri talqylandy, dep habarlady ákimdiktiń baspasóz qyzmetinen.
Eleýsin Saǵyndyqov óz sózinde, uıymdastyrý komıteti men aımaqtyq estafetaǵa daıyndyq júrgizý jáne ony ótkizý jónindegi oblystyq shtab qurylǵanyn, jumys josparlary, estafeta baǵyty naqtylanǵanyn atap kórsetti.
Azıada alaýy 18 qańtarda saǵat 20.00-de charterlik reıspen Aqtóbege jetkiziledi. Al kelesi kúni saǵat 11.30-da oblystyq ákimdiktiń aldyndaǵy alańda Alaý estafetasy bastalady.
Oblys ákimi óz sózin túıindeı kele, osyndaı úlken sharanyń ótkizilýimen baılanysty barsha aqtóbelikterge úlken jaýapkershilik pen mindet júktelip otyrǵanyn eske saldy jáne olardy Alaý estafetasyn toılaýǵa belsendi atsalysýǵa shaqyrdy.
