Azııalyq medıa korporatsııa basshylary Astanada bas qosady
Aıtýly shara sheńberinde semınarlar, konferentsııalar, sonymen birge Azııa radıosynyń án festıvali ótkiziledi. Іs-sharany QR Aqparat jáne kommýnıkatsııalar mınıstrligi, Azııa-Tynyq muhıt habar taratý odaǵy, (ATMHTO), «Qazmedıa ortalyǵy» basqarýshy kompanııasy «Astana Konvenshn Bıýromen» birge uıymdastyryp otyr.
«Búgin biz Aqparat jáne komýnıkatsııalar mınıstrligi jáne Azııa-Tynyq muhıt habar taratý odaǵy birigip qolǵa alǵan «Azııa medıa dıalogy» jobasynyń bastalǵaly jatqanyn habarlaý úshin jınalyp otyrmyz. Bul is-sharada birneshe semınar men konferentsııa ótedi. Talqylanatyn basty taqyryptyń biri - teleradıohabar taratý salasyn zamanǵa laıyq damytý. Forýmǵa Azııa-Tynyq Muhıt elderi ulttyq jáne aımaqtyq habar taratý birlestikteriniń júzden asa ókilderi qatysady. Sonymen qatar, qazaqstandyq medıa menedjerler men jýrnalıster osy is-sharaǵa aýqymdy túrde atsalysady degen úmittemiz. Televızııa men radıo joǵary tehnologııa boıynsha árdaıym damýy kerek ekenin bárimiz jaqsy túsinemiz. Qazaqstandyq BAQ ta bul úrdisten qalys qalmaýy tıis», - dedi búgin OKQ-da ótken baspasóz máslıhatynda QR Aqparat jáne kommýnıkatsııalar mınıstri Dáýren Abaev.
Joba aıasynda medıa salasyndaǵy basshylar úshin semınarlar tyń amalmen radıo formatyn daıyndaýǵa, aýdıtorııany zertteý quraldaryn baǵalaýǵa, Eýropa men Azııanyń medıa naryqtarynyń ınteraktıvti úlgilerin jáne ozyq tájirıbelerin kórsetýge, sol arqyly kópplatformaly jáne birplatformaly baǵdarlamalardy qoldanýǵa qatysty máseleler kóteriledi.
Budan basqa alǵash ret Qazaqstanda eń iri salalyq konferentsııalar ótkizilmek. Olardyń biri - Azııa radıolary máselelerine arnalǵan. Azııa men Eýropa medıasyna ortaq máselelerdi talqylaý masqatynda túıindeýshi shara - «Media-2020» konferentsııasy uıymdastyrylady. Onda Aýstralııa, Belgııa, Germanııa, Japonııa, Qytaı, Eýropa men Azııanyń basqa elderiniń jeke ári ulttyq tele jáne radıokompanııalarynyń jetekshi ókilderi moderator bolady.
Azııa-Tynyq muhıty óńiri elderiniń jyl saıynǵy án baıqaýy bolyp tabylatyn «Eýrovıdenıe» sekildi «ABU Radio Song Festival» án festıvali - Astana mereıtoıyna oraı erekshe syı bolmaq. Bıyl Qazaqstan - Ortalyq Azııada osy festıvaldi qabyldaıtyn alǵashqy el. Festıvalge Túrkııa, Nepal, Maldıv, Qazaqstan jáne ózge de elderdiń ónerpazdary qatysady. Іs-shara Qazmedıa ortalyǵynyń kontsert-zalynda ótkiziledi.
