Azııaǵa anaǵurlym myqty ınstıtýttar qajet - Prezıdent
ASTANA. KAZINFORM - Memleket basshysy ym-Jomart Toqaev AÓSShK VII sammıtinde sóılegen sózinde sammıt forýmnyń mańyzyna eleýli syn-qater tónip turǵan kezeńde ótip jatqanyn aıtty.
Prezıdenttiń pikirinshe, álemde tyńǵylyqty baıyptap, muqııat oılastyrylǵan sheshimdi qajet etetin asa kúrdeli ári buryn-sońdy bolmaǵan úderister oryn alyp jatyr.
– Túptep kelgende, halyqaralyq qaýipsizdik arhıtektýrasynyń irgesi shaıqala bastady. Bul jaıt quqyq ústemdigi kóleńkede qalyp, kúsh kórsetý basymdyqqa ıe bolǵan qaýipti úrdispen qatar júrýde. Byltyr álemde qarýly qaqtyǵystar sany Ekinshi dúnıejúzilik soǵys kezindegi kórsetkishten asyp tústi. Bul kıkiljińderdiń quny statıstıkalyq derektermen ǵana emes, adam ǵumyrymen de ólshenip jatyr. Ótken jyldyń ózinde 20 qarýly qaqtyǵys bolyp, 37 myńnan astam beıbit turǵyn ajal qushty. 117 mıllıonnan asa adam bosqynǵa aınaldy, al 266 mıllıon jan isher asqa jarymaı otyr. Bul úrdis uzaq jyldar boıy jahandyq turaqtylyq pen qaýipsizdikke qol jetkizýge baǵyttalǵan birlesken saıası kúsh-jigerdiń nátıjesin joqqa shyǵardy. Sondyqtan Azııaǵa anaǵurlym myqty ınstıtýttar qajet. Nıettestik jónindegi deklaratsııalar qabyldaýdyń dáýiri ótti, – dedi Qasym-Jomart Toqaev.
Prezıdent 2022 jyly Astanada uıymdastyrylǵan VI sammıtte AÓSShK múshe memleketteri Keńesti tolyqqandy halyqaralyq uıymǵa aınaldyrýǵa ýaǵdalasqanyna nazar aýdardy.
– Búginde Uıymǵa tóraǵalyq etip otyrǵan Ázerbaıjan bul mıssııany laıyqty deńgeıde iske asyryp keledi. AÓSShK Jarǵysynyń qabyldanýyn asyǵa kútemiz. Bul aldaǵy is-qımylymyzdyń jol kartasy bolady. Qazaqstannyń AÓSShK transformatsııasyna qatysty ustanymy buǵan deıin bekitilgen mindettemelerge negizdelgen. Sondaı-aq ortaq túsinistikke qol jetkizýge jáne tıisti kelisimderdi ázirleýge ıkem tanytýdy basshylyqqa alady. Keńes Azııadaǵy ornyn saqtaı otyryp, jahandyq seriktestermen yntymaqtastyqqa ashyq ınstıtýt bolýǵa tıis. Uıym ózara senim rýhyndaǵy dáıekti dıalog pen syndarly konsýltatsııaǵa negizdelgen qaýipsizdik modelin ilgeriletýi kerek, – dedi Memleket basshysy.
