Azııadany ótkizý Qazaqstannyń Azııadaǵy beıbitshilik pen dostyqty nyǵaıtýdaǵy jańa qadamy bolyp tabylady - QHA
ANA. 7 aqpan. QazAqparat. 6 aqpan kúni Almaty qalasynda tek Qazaqstan úshin ǵana emes barsha Azııa kontınenti jáne álemdik Olımpııadalyq qozǵalys úshin sózsiz erekshe oqıǵa bolǵan VII qysqy Azııalyq oıyndardyń jabylý saltanaty boldy.
Alǵash ret Azııadada 11 sport túrinen oıynǵa 69 jıyntyq nagrada tigildi. Júlde bólisýge qatarynda álem chempıonattary men Olımpııada oıyndary júldegerleri bar Azııanyń 27 memleketiniń 1000-ǵa jýyq sportshylary qatysty. Azııa oıyndar barysynda kontınentte qoıylǵan 10 rekord jańardy.
VII qysqy Azııa oıyndary kúnderi álemdik aqparat aǵynynyń nazaryn ózine qaraı burdy. Álemniń 500 mln. turǵyny jarystardy jiti baqylap, 20-dan astam álemdik telearnalar, 17 eldiń 2 myńnan astam tilshileri sporttaǵy arpalysty jahanǵa taratty.
Qazaqstan quramasy 70 medal, onyń ishinde 32 altyn, 21 kúmis, 17 qola medaldardy jeńip alyp, qysqy Azııa oıyndarynyń tarıhynda jańa rekordty bekitti. Bul bizdiń sportshylarymyzdyń álemdik deńgeıdegi belesterdi baǵyndyrýǵa daıyn ekenin kórsetetin keremet jetistik.
Qazaqstandyq sportshylardyń jeńisi Memleket basshysynyń elimizdegi buqaralyq sportty damytýǵa qamqorlyǵynyń aıqyn kórinisi. Azııadaǵa daıyndyq barysynda búginde eldiń ıgiligine aınalǵan álemdik deńgeıdegi ondaǵan sport keshenderi salynyp, kúrdeli jóndeýden ótti, olardyń keıbiri álemde teńdesi joq qurylys jobalary bolyp tabylady.
VII Azııada Qazaqstannyń bedelin álemdik qaýymdastyqqa jańa qyrynan ıaǵnı, tek beıbitshilik pen kelisimniń, senimdi ekonomıkalyq damý men halyqaralyq áriptes retinde ǵana emes, sport derjavasy retinde tanytty.
Azııadany ótkizý Qazaqstannyń Azııadaǵy beıbitshilik pen dostyqty nyǵaıtýdaǵy jańa qadamy bolyp tabylady.
VII qysqy Azııa oıyndaryndaǵy jetistigimiz bul - Nursultan Ábishuly Nazarbaevtyń saıasatynyń, aýyzbirshiligi mol Qazaqstan halqynyń jetistigi, elimizdiń Táýelsizdiginiń 20 jyldyǵyna úlken syı.
Qazaqstan halqy Assambleıasy barsha halyqty bizdiń ulttyq quramamyzdyń aıbyndy jeńisimen quttyqtaıdy!
Jalpy komandalyq esepte bizdiń quramamyzdyń alǵa shyǵýy rýhtyń kúshin, jeńiske degen jigerdi, otansúıgishtik pen bizdiń halqymyzdyń birligin taǵy da aıqyn dáleldep berdi. Bizdiń jeńisimiz Erlik pen Jigerdiń jáne Tutastyqtyń, Táýelsizdik pen Birliktiń úlgisi.
Osy aıtýly kúnder boıy ulttyq quramnyń sportshylary bizdiń ulttyq maqtanyshymyz úshin, el namysy úshin kúresti jáne jeńiske jetti!
Bul jeńis Qazaqstannyń álemdik saıasat nemese sport salasyndaǵy kez kelgen halyqaralyq sharany laıyqty deńgeıde iske asyra alatynyna senimdi nyǵaıtyp árbir azamattyń júregine óz eline degen maqtanysh sezimin toltyrady.
Qazaqstan halqy Assambleıasy osy jeńis barsha halyqty Tuńǵysh Prezıdent, Ult Kóshbasshysy Nursultan Ábishuly Nazarbaevtyń basshylyǵymen ál-aýqatty, gúldengen Qazaqstandy qurý jolynda taǵy bir biriktirýshi faktor bolatynyna senimdi!
