Azıadada altyn alǵan Vladıslav Kıreev: Búgin oıymyzdaǵynyń bárin júzege asyrdyq

ASTANA. KAZINFORM – Qytaıda ótip jatqan ІH qysqy Azııa oıyndarynda bıatlonnan altyn alǵan Vladıslav Kıreev jarystyń qalaı ótkeni jáne jeńisten keıingi áserimen bólisti, dep habarlaıdy Kazinform tilshisi UOK-ke silteme jasap. 

— Búgin oılaǵanymyzdyń bárin iske asyra aldyq. Bizge bul júldeniń mańyzy joǵary.  Daıyndyǵymyzdyń nátıjesin kórsete aldyq. Birinshi oryndy da, ekinshi oryndy da qanjyǵamyzǵa baıladyq, - deıdi Vladıslav Kıreev. 

Dese de óz sózinde ol bastapqyda dodanyń sátsiz bastalǵanyn jetkizdi.

— Jarystyń qalaı ótkenine qatysty aıtar bolsaq, alǵashqy atý alańyna jetkende birinshi atqan oǵym múlt ketti. Sebebi dál ataıyn dep jatqanda jel soǵyp, kedergi keltirdi. Bul sol kezdegi basty kemshiligim boldy dep oılaımyn. Al qalǵanynyń bári jaqsy boldy. Kóp artta qalyp qalmadym. Bapkerler meni qashyqtyqta baǵyttap otyrdy. Bastalǵandaǵy jyldamdyǵym tez bolmady. Biraq bastaı salǵandaǵy jyldamdyq — únemi jaqsy bola bermeıdi. Jyldam bastap, márege baıaý jetip jatatyndar bolady. Sondyqtan men ortasha qarqyndy tańdadym, - deıdi sportshy.

Birinshi aınalymda jeńilip kele jatqanmyn. Aradaǵy alshaqtyq az boldy — shamamen 9 sekýndtaı.

— Aıyp sheńberin aınalǵan boıda atý alańynan shyqtym. Ary qaraı qarqyndy údetip, jete berdim. Sóıtip, basyp ozyp, altyn medal aldym. Bul doda basyndaǵy mańyzdy jeńis. Tek men úshin emes, búkil Qazaqstan úshin, elimizdiń sportshylary úshin. Azııa oıyndary — ekinshi Olımpıada. Sondyqtan kez kelgen medaldyń mańyzy zor. Bastysy, birinshi jáne ekinshi oryn da bizdiń qorjynymyzǵa tústi, - deıdi Vladıslav Kıreev. 

Onyń aıtýynsha, bul jeńis aldaǵy jarystarda sportshylarymyzǵa senimdilik beredi. 

— Bizde bosańsýǵa ýaqyt joq. Ary qaraı álem chempıonaty men álem kýbogi ótedi. Osylaı óner kórsetýdi jalǵastyryp, Olımpıada oıyndaryna joldama alý úshin upaı jınaýymyz qajet. Osy rette, jeńis tuǵyrynda joldastaryńmen birge turǵannyń ǵanıbet etkenin aıtqym keledi.

Ásirese, halyqaralyq týrnırlerde. Vadımdi medalimen quttyqtaımyn. Men jalǵyz emes, birge jattyǵyp, talaı sátterdi bastan ótkergen adammen jeńis tuǵyryna birge kóterilgenime qýanyshtymyn, - deıdi bıatlonshy. 

Eske salsaq, buǵan deıin bıatlonnan Qazaqstan erler quramasy altyn jáne kúmis medal enshilegenin habarlaǵan edik.