Azıada: Abıba Ábýjaqynova, Esmıgúl Kýıýlova jáne Sáken Bıbosynov bala kezinde kórshi turǵan
Qytaıdyń Hanchjoý qalasynda ótip jatqan Azııa oıyndarynda júldeger atanǵan el sportshylary Abıba Ábýjaqynova, Esmıgúl Kýıýlova jáne áli de saıys jolyndaǵy Sáken Bıbosynov bir aýyldan ári bala kezinde kórshi turǵan, dep habarlaıdy QazAqparat.
Atalǵan úsh sportshy da Ózbekstannyń Shyrshyq aýdanyna qarasty Tabaqsaı aýlynda dúnıege kelgen. Bul aqparatty QazAqparat tilshisine bergen suhbaty barysynda Abıba Ábýjaqynova rastady.
«Iá, Sáken men Esmıgúl meniń kórshilerim. Esmıgúlmen jaqsy aralastyq, al Sákendi ol kezde tanymaıtyn edim. Keıin tanystym. Ol bokspen aınalysty, múmkin sodan keıin bir-birimizdi bilmegen shyǵarmyz. Negizi Sáken ekeýmiz rýlaspyz», - dep QazAqparat tilshisiniń saýalyna jaýap berdi sportshy Abıba Ábýjaqynova.
Toqtala ketsek, Olımpıada júldegeri Sáken Bıbosynov 13 jasynda Ózbekstannan Qazaqstanǵa kóship kelgen. Abıba Ábýjaqynova da boıjetken shaǵynda tarıhı otanyna oralyp, Almatydaǵy respýblıkalyq sport kolledjine oqýǵa túsken. Sáken men Abıba qurdas, aralary bir kún. Boksshy S.Bıbosynov 1997 jyly 3 shildede týsa, dzıýdoshy Abıba Ábýjaqynova 1997 jyly 4 shildede dúnıege kelgen. Al Esmıgúl Kýıýlova 2002 jyly 11 mamyrda týǵan.
Búginde dzıýdoshylar Abıba Ábýjaqynova men Esmıgúl Kýıýlovanyń Azııa oıyndaryndaǵy kezdesýleri aıaqtaldy. Alǵashqysy el qorjynyna kúmis medal salsa, ekinshisi tuǵyrǵa úshinshi bolyp kóterildi.
Qos birdeı júldegerdiń kórshisi bolǵan bylǵary qolǵap sheberi Sáken Bıbosynov 25 qyrkúıekte Azııa oıyndarynda alǵashqy jeńisine qol jetkizdi. Osylaısha, qazaqstandyq boksshy kelesi aınalymǵa ótti.
