Azııa jeńil atletıka qaýymdastyǵynyń kúntizbesine 2 qazaqstandyq týrnır endi
ASTANA. QazAqparat - Azııa jeńil atletıka qaýymdastyǵy 2018 jylǵy jarystardyń kúntizbesin jasady, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Bul tizimge Qazaqstannan 2 halyqaralyq týrnır engen. Onyń biri - 20 qańtar kúni Óskemen qalasynda Olımpıada chempıony Olga Rypakovanyń júldesine arnalǵan dástúrli halyqaralyq jarys.
Bul doda osymen tórtinshi ret uıymdastyrylmaq. Bıylǵy jyly aqpan aıynda ótkizilgen úshinshi týrnırge 8 eldiń sportshylary kelip qatysqan bolatyn.
Ekinshisi 28-29 maýsymda Rım Olımpıadasynyń kúmis júldegeri Ǵusman Qosanovty eske alýǵa arnalǵan XXVIII halyqaralyq jarys. Atalǵan memorıalǵa qatysýshylar 30 jekelegen saıys boıynsha synǵa túsedi (15-i erler, 15-i áıelder arasynda). Uıymdastyrýshylar dástúrli túrde 100 metrge júgirgenderdiń ishinde úzdik shyqqan atletke arnaıy syılyq taǵaıyndaıdy.
